Kapiteni w'Amavubi ntabwo azagaragara ku mukino wa Lesotho

Ku munsi w'ejo ni bwo Amavubi yari yakiriye Nigeria mu mukino wo ku munsi wa 5 mu itsinda C mu gushaka itike y'igikombe cy'Isi cya 2026 kizabera muri Mexico, Canada na Leta zunze Ubumwe z'Amerika.

Muri uyu mukino warangiye Nigeria itsinze ibitego 2-0, Bizimana Djihad usanzwe ari na kapiteni w'ikipe y'igihugu y'u Rwanda, Amavubi yabonye ikarita y'umuhondo ku munota wa 46 biturutse ku ikosa yari akoreye Victor Osimhen wari ufite umupira hafi y'urubuga rw'amahina.

Iyi ni ikarita ya kabiri y'umuhondo uyu mukinnyi yari abonye muri iyi mikino kuko yari yabonye indi ku mukino ubanza wa Lesotho aho Amavubi yayitsinze 1-0.

Ibi bivuze ko Bizimana Djihad atazakina umukino wo ku munsi wa 6 wo mu itsinda C ikipe y'igihugu y'u Rwanda, Amavubi izakinamo na Lesotho kuwa Kabiri w'icyumweru gitaha muri Stade Amahoro.

Kugeza ubu Amavubi ari ku mwanya wa gatatu n'amanota 7 aho arushwa na Afurika y'Epfo iri ku mwanya wa mbere amanota 3, akarushwa Benin iri ku mwanya wa 2 inota rimwe mu gihe yo arusha Lesotho iri ku mwanya wa 5 amanota abiri. 

Bizimana Djihad ntabwo azagaragara ku mukino Amavubi azakinamo na Lesotho