Kigali: RGB n'abanyamadini baganiriye ku mabwiriza mashya agenga imiryango ishingiye ku myemerere

Nk’uko tubikesha ikinyamakuru Kinyamateka, iyi nama yari igamije kuganira ku mabwiriza mashya yashyizweho n'Urwego rw'Igihugu rw'Imiyoborere, aho agenga ibisabwa imiryango ishingiye ku myemerere, akaba kandi agizwe n'ingingo 26.

Umuyobozi Mukuru w’Urwego rw’Imiyoborere, RGB, Dr. Doris Uwicyeza Picard ari nawe watangije iyi nama yahuje amadini n'amatorero, agaruka ku mpamvu y'aya mabwiriza yagize ati: "Aya mabwiriza mashya yashyizweho agamije guteza imbere imikorere myiza, gukorera mu mucyo no kwirinda ibikorwa bishobora guhungabanya umutekano w'Igihugu n'imibereho myiza y'abaturage''.

Umuyobozi w'Ihuriro ry'Amadini n'Amatorero mu Rwanda, Musenyeri Mbanda Laurent, yavuze ko n'ubwo aya mabwiriza mashya asaba imiryango y'amadini n'amatorero gukora impinduka, ari iby'agaciro kuko bizabafasha gukorera mu mucyo no kwirinda gukorera mu kajagari. 

Yagize ati: “Aya mategeko agamije kuturinda gukorera mu kajagari, kandi kudufasha gukurikiza umurongo w’igihugu, ari nawo w’ibyerekezo by’igihugu cyacu. Ni ukwihangana no gushyira imbaraga mu kubahiriza amategeko kugira ngo twese tujye mu murongo mwiza.”

Judith Kazaire, Umuyobozi w’Ishami rishinzwe Sosiyete Sivile n’Imitwe ya Politiki mu Rwego rw'Igihugu rw'Imiyoborere, yagarutse ku ngingo y’amadini n’amatorero bigifunze, avuga ko bizaterwa n'uko abayobozi b’amadini n’amatorero bazagenda bagira imyitwarire myiza mu kubahiriza amabwiriza mashya. 

Yagize ati: "Kubasura bizaterwa nabo, kubasura tubikora dufatanyije n'inzego zindi nka Rwanda Local Government ariko birasaba ko aya mabwiriza mashya bayareba bakubahiriza ibikubiyemo hanyuma bagasaba gufungurirwa. 

Mu byumweru bibiri bishize amabwiriza asohotse nta busabe turakira bugaragaza ko hari abamaze kuzuza ibisabwa, nyuma yuko bayarebye bakabyuzuza bazagaruka dosiye zabo zigweho nibaba babyujuje bafungurirwe''.

Yanavuze ko kandi, igihe amadini n'amatorero byahawe kugira ngo babe bamaze kuzuza ibisabwa, nk’uko amabwiriza abiteganya ari igihe cy'amezi 12 abarwa uhereye igihe aya mabwiriza yasohokeye mu igazeti ya Leta, aho yasohotse tariki 07 Werurwe 2025 bivuze ko ubu yatangiye gukurikizwa.

Nyuma yo gusobanurirwa ibikubiye mu ma bwiriza agenga imiryango ishingiye ku myemerere, abitabiriye ibi biganiro batanze ibitecyerezo. Ibyinshi byibanze ku gusaba RGB gushyiraho uburyo bwo gukomeza guhugura iyi miryango kugira ngo babashe gusobanukirwa n’ibikubiye mu mabwiriza.