Rayon Sports yemeje ko rutahizamu wayo atazongera gukandagira mu kibuga muri uyu mwaka w'imikino

Ku wa Gatandatu Saa Kumi n'Imwe z'umugoroba, nibwo Amagaju FC yari yakiriye Rayon Sports mu mukino wo ku munsi wa 18 wa shampiyona y'icyiciro cya mbere mu Rwanda.

Mu minota ya nyuma y'uyu mukino warangiye amakipe yombi anganya igitego 1-1, rutahizamu w'ikipe ya Rayon Sports,Fall Ngagne wari wanabatsindiye iki gitego yagize ikibazo cy'imvune nyuma y'uko yari agwiriwe n'umunyezamu w'Amagaju FC,Kambale Kilo Dieume ndetse ahita anasohorwa ku ngombyi y'abarwayi.

Nyuma y'ibi ku munsi w'ejo hari hagiye hanze amakuru  ko ashobora kutongera gukandagira mu kibuga muri uyu mwaka w'imikino bitewe n'iyi mvune none Rayon Sports yabyemeje mu ijoro ryo kuri uyu wa Mbere binyuze mu itangazo yanyujije ku mbuga nkoranyambaga zayo.

Yanditse iti"Rayon Sports yemeje ko Fall Ngagne, umukinnyi ufite ibitego byinshi muri Rwanda Premier League aho yatsinze ibitego 13 mu mikino 14 yakinnye, azabura igihe gisigaye cya shampiyona ya 2024/25 nyuma yo kugira imvune ikomeye ya ACL ku ivi ry'iburyo ubwo twakinaga na Amagaju FC ku wa Gatandatu ushize".

Amakuru avuga ko Fall Ngagne azabagwa udutsi two mu ivi (ligaments croisés) bityo akaba azamara amezi ari hagati ya 6-9 ari hanze y'ikibuga.

Rayon Sports ihuye n'ikibazo gikomeye dore ko ibitego 30 imaze kwinjiza muri shampiyona harimo 13 bye. Avunitse y'inyongera kuri Muhire Kevin nawe wavunitse dore atakinnye n'umukino w'Amagaju FC.

Kugeza ubu Rayon Sports iracyayoboye urutonde rwa shampiyona n'amanota 41 aho irusha APR FC iyikurikiye amanota 4. Murera iragaruka mu kibuga kuri uyu wa Gatatu yakira Gorilla FC mu mukino wa 1/4 cy'Igikombe cy'Amahoro.

Fall Ngagne ntabwo azongera kugaragara mu kibuga muri uyu mwaka w'imikino