Bonheur yongeye kubona izamu! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri Libya,ku wa Gatatu w'icyumweru gishize, ikipe ya Al Ahli Tripoli ikinamo Manzi Thierry na Bizimana Djihad yanganyaga na Elettihad 0-0.

Muri uyu mukino, myugariro w'Amavubi yabanje mu kibuga ndetse ntiyasimbuzwa naho Kapiteni w'Amavubi wakinaga umukino we wa mbere muri iyi kipe kuva imuguze mu kwezi gushize,yinjiyemo asimbuye ku munota wa 46.

Ku munsi w'ejo ku Cyumweru nabwo Al Ahli Tripoli yanganyije na Al Madina 1-1. Manzi Thierry yabanje mu kibuga ndetse ntiyasimbuzwa naho Bizimana Djihad we yabajemo asimbuzwa ku munota wa 56.

Kugeza ubu Al Ahli Tripoli iri ku mwanya wa mbere ku rutonde rwa shampiyona n'amanota 32, ikaba izasubira mu kibuga ikina na Al Dhahra mu kwezi gutaha kwa 3.

Muri Afurika y'Epfo,ku wa Kabiri w'icyumweru gishize ikipe ya Kaizer Chiefs ikinamo Ntwari Fiacre yanyagirwaga na Super Sport United 4-1.

Uyu munyezamu w'Amavubi ntabwo yari no ku ntebe y'abasimbura. Kugeza ubu Kaizer Chiefs iri ku mwanya wa 7 ku rutonde rwa shampiyona, ikaba izasubira mu kibuga ikina na Mamelodi Sundowns ku wa Gatandatu.

Muri shampiyona y'icyikiro cya mbere mu Misiri,ku munsi w'ejo ku Cyumweru ikipe ya Zed FC ikinamo Rafael York yatsindaga El Mahalia 2-0.

Uyu mukinnyi w'Umunyarwanda ntabwo yabanje mu kibuga gusa yari ku ntebe y'abasimbura nubwo atakoreshejwe.

Kugeza ubu Zed FC iri ku mwanya wa 9 ku rutonde rwa shampiyona, ikaba izasubira mu kibuga ikina na Zamalek ku wa Kane w'iki cyumweru.

Muri shampiyona y'icyiciro cya mbere muri Tunisia,ku wa Gatatu Stade de Tunisien ikinamo Mugisha Bonheur yatsindwaga na ES Sahel ibitego 3-1.

Uyu mukinnyi w'Umunyarwanda yari yabanje mu kibuga ndetse ni nawe watsinze iki gitego 1 ku munota wa 62 kuri penaliti.

Kugeza ubu Stade de Tunisien iri ku mwanya wa 6 ku rutonde rwa shampiyona ikaba izasubira mu kibuga ikina na Ben Guerdane ku wa Kane.

Tukiri muri iyi shampiyona,ku munsi w'ejo ku Cyumweru ikipe ya Olympique de Beja ikinamo Ishimwe Anicet yatsindwaga na Club Africain ibitego 2-0.

Uyu mukinnyi w'Umunyarwanda yari yabanje mu kibuga gusa aza gusimbuzwa ku munota wa 46. Kugeza ubu ikipe ya Olympique de Beja iri ku mwanya wa 9 ku rutonde rwa shampiyona, ikaba izasubira mu kibuga ikina na Sfaxien ku wa Kane w'iki Cyumweru.

Muri shampiyona y'icyiciro cya mbere muri Azerbaijani,ku wa Gatandatu ikipe ya Sabail FK ikinamo Nshuti Innocent yanganyaga na Araz 0-0.

Uyu rutahizamu w'ikipe y'igihugu y'u Rwanda, Amavubi ntabwo yigeze akoreshwa kuri uyu mukino gusa yari ku ntebe y'abasimbura. Kugeza ubu Sabail FK iri ku mwanya wa nyuma ku rutonde rwa, ikaba izasubira mu kibuga ikina na Qarabag ku wa Kane w'iki Cyumweru.

Muri iyi shampiyona Kandi Zira FK ikinamo Mutsinzi Ange, irajya mu kibuga uyu munsi ikina na Kapaz. 

Muri shampiyona y'icyiciro cya Kabiri mu Bubiligi,ku munsi w'ejo ikipe ya Raal La Louviere ikinamo Samuel Gueulette yanganyaga na Patro Eisden 1-1. Muri uyu mukino ntabwo uyu mukinnyi w'Amavubi yigeze akoreshwa gusa yari ku ntebe y'abasimbura.

Kugeza ubu Raal La Louviere iri ku mwanya wa 3 ku rutonde rwa shampiyona, ikaba izasubira mu kibuga ikina na Eupen ku wa Gatanu.

Muri shampiyona y'icyiciro cya mbere mu Bubiligi,ku wa Gatandatu ikipe ya K. Beerschot V.A ikinamo Hakim Sahabo yanganyaga na Dender 0-0. Uyu mukinnyi w'Amavubi yari yabanje mu kibuga gusa aza gusimbuzwa ku munota wa 75.

K. Beerschot V.A. iri ku mwanya wa nyuma ku rutonde rwa shampiyona, ikaba izasubira mu kibuga ikina na Mechelen ku Cyumweru.

Mugisha Bonheur yatsindaga igitego cya 4 kuva ageze muri Stade de Tunisien