Inkuru itari nziza kuri Rayon Sports

Ku wa Gatandatu Saa Kumi n'Imwe z'umugoroba nibwo Amagaju FC yari yakiriye Rayon Sports mu mukino wo ku munsi wa 18 wa Shampiyona y'icyiciro cya mbere mu Rwanda.

Mu minota ya nyuma y'uyu mukino warangiye amakipe yombi anganya igitego 1-1, rutahizamu w'ikipe ya Rayon Sports,Fall Ngagne wari wanabatsindiye iki gitego yagize ikibazo cy'imvune nyuma y'uko yari agwiriwe n'umunyezamu w'Amagaju FC,Kambale Kilo Dieume ndetse ahita anasoghorwa ku ngombyi y'abarwayi.

Nyuma y'ibi hagiye hanze  amakuru ko uyu mukinnyi ukomoka muri Senegal ashobora kumara amezi 9 adakandagira mu kibuga bitewe nuko imvune yagize ikomeye.

Rayon Sports yaba ihuye n'ikibazo gikomeye dore ko ibitego 30 imaze kwinjiza muri shampiyona harimo 13 bye. 

Uyu rutahizamu uyoboye abandi mu gutsinda ibitego byinshi muri shampiyona y'u Rwanda aho afite ibitego 13, avunitse mu gihe na Muhire Kevin yavunitse ndetse akaba atarakoreshejwe no ku mukino w'Amagaju FC.

Kugeza ubu Rayon Sports iracyayoboye urutonde rwa shampiyona n'amanota 41 aho irusha APR FC iyikurikiye amanota 4. 

Murera iragaruka mu kibuga kuri uyu wa Gatatu yakira Gorilla FC mu mukino ubanza wa 1/4 cy'Igikombe cy'Amahoro.

Fall Ngagne ushobora kumara amezi 9 adakandagira mu kibuga 

Fall Ngagne niwe wari watsindiye Rayon Sports ku mukino n'Amagaju FC