Abenshi intsinzi zarabuze! Uko Abakinnyi b'Abanyarwanda bakina hanze bitwaye mu Cyumweru gishize

Duhereye muri Kenya, ku Cyumweru ikipe ya AFC Leopards ikinamo Gitego Arthur yanganyaga na F.C. Kariobangi Sharks 0-0. Kuri uyu mukino ntabwo uyu rutahizamu w'Amavubi yari yabanje mu kibuga ndetse nta n'ubwo yari ku ntebe y'abasimbura.

Kugeza ubu AFC Leopards iri ku mwanya wa 6 ku rutonde rwa shampiyona ikaba izasubira mu kibuga ikina na Sofapaka kuwa Gatatu.

Muri shampiyona y'icyiciro cya mbere muri Libya, kuwa Kane w'icyumweru gishize ikipe ya Al Ahli Tripoli ikinamo Manzi Thierry ndetse ikaba iheruka no gusinyisha Bizimana Djihad yatsindaga Libyan Stadium ibitego 3-0.

Ntabwo Manzi Thierry yari kuri uyu mukino bitewe nuko amaze iminsi afite ikibazo cy'imvune gusa kuri ubu ari gukira. 

Biteganyijwe ko iyi kipe iri ku mwanya wa mbere ku rutonde rwa izasubira mu kibuga kuwa Gatatu ikina na Asaria ndetse akaba ari na bwo Bizimana Djihad ashobora kuzakina umukino we wa mbere muri iyi kipe.

Muri shampiyona y'icyiciro cya mbere muri Tunisia, kuwa Gatandatu ikipe ya Stade de Tunisien ikinamo Mugisha Bonheur yatsindwaga na ES Tunis 1-0.

Uyu mukinnyi w'Umunyarwanda yabanje mu kibuga ndetse nta n'ubwo yigeze asimbuzwa. Kugeza ubu Stade de Tunisien iri ku mwanya wa 6 ku rutonde rwa shampiyona izasubira mu kibuga ikina na Bizertin ku munsi wejo kuwa Kabiri.

Muri iyi shampiyona kandi kuwa Gatandatu ikipe ya Olympique de Beja ikinamo Ishimwe Anicet yanganyaga na Ben Guerdane 0-0.

Ntabwo uyu mukinnyi w'Umunyarwanda yari yabanje mu kibuga gusa yinjiyemo asimbuye ku munota wa 46. Kugeza ubu Olympique de Beja iri ku mwanya wa 9 ku rutonde rwa shampiyona ikaba izasubira mu kibuga ikina na JS Omrane kuwa Kane .

Muri shampiyona y'icyiciro cya mbere muri Afurika y'Epfo, kuwa Gatanu w'icyumweru gishize ikipe ya Kaizer Chiefs ikinamo Ntwari Fiacre yatsindaga Stellenbosch 1-0.

Uyu munyezamu w'Amavubi ntabwo yabanje mu kibuga ariko yari ku ntebe y'abasimbura. Kugeza ubu Kaizer Chiefs iri kumwanya wa 5 ku rutonde rwa shampiyona ikaba izasubira mu kibuga ikina na Chippa United muri 1/8 cy'Igikombe cy'igihugu.

Muri Azerbaijani, kuwa Kane w'icyumweru gishize ikipe ya FC Zira ikinamo Mutsinzi Ange yatsindwaga na Araz Naxcivan 1-0 mu mukino ubanza wa 1/4 cy'gikombe cy'igihugu.

Uyu myugariro w'Amavubi yari yabanje mu kibuga ariko aza gusimbuzwa ku munota wa 73. Iyi kipe ya FC Zira irasubira mu kibuga muri shampiyona ikina na Neftci kuri uyu Wa Mbere.

Muri iki gikombe cy'igihugu kandi kuwa Kane ikipe ya Sabail FK ikinamo Nshuti Innocent yatsindwaga na Qarabag FK 1-0. Uyu rutahizamu w'ikipe y'igihugu y'u Rwanda, Amavubi yari ari ku ntebe y'abasimbura ariko ntabwo yigeze akinishwa.

Sabail FK izasubira mu kibuga kuwa Kabiri ikina na Qarabag FK muri shampiyona. Muri shampiyona y'icyiciro cya kabiri mu Bubiligi, ku Cyumweru ikipe ya Raal La Louviere ikinamo Samuel Gueulette yanyagiye Lokeren-Temse ibitego 5-0.

Uyu mukinnyi w'Amavubi yari yabanje mu kibuga gusa yasimbujwe igice cya kabiri kigitangira. Kugeza ubu Raal La Louviere iri ku mwanya wa 3 ku rutonde rwa shampiyona ikaba izasubira mu kibuga kuwa Gatandatu ikina na RFC Seraing.

Ku Cyumweru muri shampiyona y'icyiciro cya mbere mu Bubiligi, ikipe ya Kbeerschot VA ikinamo Hakim Sahabo yanganyaga na Charleroi 1-1.

Uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu iri ku mwanya wa nyuma ku rutonde rwa shampiyona ikaba izasubira mu kibuga ikina na Gent ku Cyumweru.