Ibihugu 10 bidafite ingabo: Uko bibungabunga umutekano wabyo

Dore ibihugu 10 byafashe uwo murongo wo kubaho nta ngabo zabyo bwite bifite:

1. Costa Rica

Nyuma y'intambara y'abenegihugu yo mu 1948, Costa Rica yasheshe igisirikare cyayo maze ishyira ingengo y'imari yacyo mu burezi n'ubuvuzi. Iki gihugu cyiringira Leta Zunze Ubumwe za Amerika n'abandi bafatanyabikorwa mu gihe k'ibikeneye mu bijyanye n'umutekano. Ibi byatumye Costa Rica imenyekana nk'igihugu gitekanye, giharanira iterambere ry'imibereho myiza n'ubungabunga ibidukikije.

2. Iceland

Iceland nta gisirikare gihoraho ifite kuva yabona ubwigenge mu 1944. Icyakora, iri mu muryango wa NATO, ikaba yishingikiriza uwo muryango mu bijyanye n'umutekano. Ifite kandi Igisirikare cy'Abaturage (Icelandic Coast Guard) gishinzwe umutekano w'imbere mu gihugu, ibikorwa by'ubutabazi no gucunga inkombe zacyo. Ibi byatumye Iceland iba kimwe mu bihugu bitekanye ku isi.

3. Liechtenstein

Mu 1868, Liechtenstein yasheshe igisirikare cyayo kubera ibibazo by'ubukungu, yiringira umutekano uturuka ku baturanyi bayo nka Switzerland na Austria. Ifite igipolisi gito gishinzwe umutekano w'imbere mu gihugu kandi ikagira politiki yo kutivanga mu makimbirane mpuzamahanga.

4. Monaco

Monaco ni igihugu gitekanye gifite igipolisi gito gishinzwe umutekano w'imbere mu gihugu no kurinda umuryango w'ubwami. Gishingira ku Bufaransa mu bijyanye no kurinda umutekano wacyo hashingiwe ku masezerano ya 1918. Giharanira ubukerarugendo bushingiye ku bukire n'ubukungu bw'ibigo by'imari, bikaba byaragifashije gutera imbere nta gisirikare gihoraho.

5. Panama

Mu 1990, Panama yasheshe igisirikare cyayo maze ishinga Panama Public Forces, igizwe n'igipolisi, serivisi z'ikirere n'izo mu mazi zishinzwe umutekano w'imbere mu gihugu no kurinda imbibi zacyo. Ifite amasezerano na Leta Zunze Ubumwe za Amerika, azwi nka Torrijos-Carter Treaties, yemerera Amerika gukoresha Umuyoboro wa Panama no kugira uruhare mu kuwurinda.

6. Vatican City

Vatican City yishingikiriza ku Butaliyani mu bijyanye n'umutekano hashingiwe ku masezerano ya 1929 azwi nka Lateran Treaty. Ifite kandi umutwe wa gisirikare wa Swiss Guard washinzwe mu 1506, ugizwe n'abasirikare b'Abasuwisi bashinzwe kurinda Papa n'inyubako za Kiliziya Gatolika.

7. Kiribati

Kiribati, igihugu kigizwe n'ibirwa mu Nyanja ya Pasifika, nta gisirikare gihoraho gifite. Cyiringira amasezerano y'ubufatanye mu by'umutekano n'ibihugu by'abaturanyi nka Ositaraliya na Nouvelle-Zélande mu gihe cy'igikeneye.

8. Samoa

Samoa yabonye ubwigenge mu 1962, isinya amasezerano y'ubucuti na Nouvelle-Zélande, yemerera icyo gihugu kugira uruhare mu mutekano wa Samoa. Ibi byatumye Samoa ishyira imbaraga mu burezi, ubuvuzi n'ibikorwaremezo.

9. Mauritius

Nyuma yo kubona ubwigenge mu 1968, Mauritius yasheshe igisirikare cyayo, ishinga Special Mobile Force (SMF) na Polisi y'Igihugu bishinzwe umutekano w'imbere mu gihugu no kurinda imbibi. Ibi byatumye igihugu gitera imbere mu bukungu no mu miyoborere myiza.

10. Palau

Palau yabonye ubwigenge mu 1994, isinya amasezerano y'ubufatanye na Leta Zunze Ubumwe za Amerika azwi nka Compact of Free Association, yemerera Amerika kugira uruhare mu mutekano wa Palau mu gihe bikenewe. Ibi byatumye Palau ibasha kubaho nta gisirikare gihoraho.

Nk'uko byagaragajwe n'ikinyamakuru Global Fire Power Ranking (GFP), ibihugu byinshi byashyize ingengo y'imari nini mu gisirikare cyabyo. Nko muri Afurika, ibihugu bifite igisirikare gikomeye birimo Misiri, Afurika y'Epfo na Nigeria nk'uko bitangazwa na Business Insider.

Gusa, ibihugu nka Mauritius byahisemo inzira yo kutagira igisirikare gihoraho, bishyira imbaraga mu bindi bikorwa by'iterambere. Ubushakashatsi bugaragaza ko ibihugu bidafite ingabo zihoraho bikoresha ingengo y'imari yabyo mu bikorwa by'iterambere ry'imibereho myiza y'abaturage, nk'uburezi, ubuvuzi n'ibikorwaremezo. Ibi bituma bigira iterambere rirambye kandi bikagira uruhare mu kubungabunga amahoro ku isi.

Vatican nta ngabo zayo bwite ifite, yishingikiriza ku Butaliyani

Misiri ishyirwa ku mwanya wa mbere mu bihugu byo muri Afrika bifite igisirikare gikomeye