Liverpool na Arsenal zaritonze! Uko amakipe ya Premier League yiyubatse mu isoko ryo muri Mutarama 2025

Isoko ryo kugura no kugurisha abakinnyi muri Premier League ryarangiye, amakipe yose uko ari 20 yakoze impinduka zitandukanye mu rwego rwo kwitegura igice cya kabiri cya shampiyona. 

Abakinnyi benshi bahinduye amakipe hagamijwe kongera imbaraga mu makipe no guhatanira ibikombe cyangwa gukomeza gukina mu cyiciro cya mbere.

Ikipe ya Arsenal ntiyaguze umukinnyi mushya, ahubwo yatandukanye n’abarimo Marquinhos wagiye muri Cruzeiro nk’intizanyo, Josh Robinson ajya muri Wigan na Maldini Kacurri wagiye muri muri Bromley.

Aston Villa yo yaguze abakinnyi batandukanye nka Donyell Malen wavuye muri Borussia Dortmund kuri £20m, Andres Garcia ava muri Levante ndetse na Marco Asensio wa PSG. 

Iyi kipe kandi yatijwe abakinnyi nka Marcus Rashford avuye muri Manchester United, irekura abakinnyi barimo Jhon Duran ajya muri Al Nassr kuri £64m, Diego Carlos yagiye muri Fenerbahce kuri £10m, na Jaden Philogene ajya muri Ipswich kuri £20m.

Chelsea yagaruye Gabriel Slonina wari muri Barnsley, Trevoh Chalobah  wari muri Crystal Palace na Aaron Anselmino wa Boca Juniors. Ben Chilwell yerekeje muri Crystal Palace ku ntizanyo, Cesare Casadei ajya muri Torino kuri £12.5m na Carney Chukwuemeka watijwe Dortmund.

Manchester United yaguze Patrick Dorgu wa Lecce kuri £30m ariko yatakaje Antony ajya muri Real Betis nk’intizanyo na Marcus Rashford muri Aston Villa nk’inguzanyo.

Man City yo yaguze Omar Marmoush muri Frankfurt kuri £59m, Nico Gonzalez muri Porto kuri £50m na Abdukodir Khusanov wa Lens kuri £33.5m. Yatakaje Kyle Walker watijwe AC Milan na Issa Kabore watijwe Werder Bremen.

Tottenham yo yatiwe Mathys Tel wa Bayern Munich na Kevin Danso wa Lens. Yatakaje abakinnyi nka Matthew Craig wagiye muri Mansfield na Alfie Dorrington wagiye muri Aberdeen76.

Newcastle yohereje Isaac Hayden muri Portsmouth nk’intizanyo, mu gihe Liverpool yatanze Stefan Bajcetic muri Las Palmas na Kaide Gordon muri Portsmouth nk’intizanyo ariko ayo makipe yombi nta bakinnyi bashya yigeze agura mu isoko ryo muri uku kwezi kwa Mutarama.

Brighton yaguze Diego Gomez wa Inter Miami kuri £11m na Eiran Cashin  wa Derby kuri £9m, itiza abakinnyi nka Evan Ferguson muri West Ham na Julio Enciso muri Ipswich.

West Ham yazanye Evan Ferguson nk’intizanyo avuye muri Brighton kugira ngo yongere imbaraga mu busatirizi.

Ikipe ya Wolves yaguze Emmanuel Agbadou wa Reims kuri £16.6m na Marshall Munetsi wa Reims kuri £16m ariko yatandukanye n’abakinnyi nka Luke Cundle ajya muri Millwall. Fulham ntiyaguze umukinnyi, ahubwo yarekuye Olly Sanderson muri Harrogate nk’inguzanyo.

Leicester yaguze Woyo Coulibaly wa Parma kuri £1.9m ariko itakaza Tom Cannon ajya muri Sheffield United kuri £10m. Ikipe ya Ipswich yo yaguze Ben Godfrey wa Atalanta na Jaden Philogene.

Nottingham Forest yaguze Tyler Bindon wakiniraga Reading naho Sheffield United igura Ben Brereton Diaz wa Sheffiel.

Mu isoko ryo mu Mutarama 2025, amakipe yatanze akayabo k’amafaranga kugira ngo yongere imbaraga, mu gihe andi yitondeye abakinnyi ifite. Uko byagenda kose, umusaruro w’iri soko uzagaragarira mu mikino yo mu gice cya kabiri cya shampiyona.

Kugeza ubu muri shampiyona y’u Bwongereza ikipe ya Liverpool niyo ya mbere aho ifite amanota 56 ikaba ikurikiwe na Arsenal ifite amanota 50 ariko Liverpool ikaba ifite ikirarane itari yakina cya Everton.

Ikipe ya Manchester United yatandukanye n'abakinnyi barimo Marcus Rashford wagiye muri Aston Villa

Arsenal na Liverpool zaritonze ku isoko ry'igura n'igurisha rya Mutarama

Man City yatandukanye n'abakinnyi barimo Kayle Walker wagiye muri Milan AC