Ku mugoroba wo ku wa 29 Mutarama 2025, indege ya American Airlines yahuye na kajugujugu ya gisirikare yo mu bwoko bwa Black Hawk hafi y'Ikibuga cy'Indege cya Ronald Reagan Washington National, ihitana abantu bose 64 bari bayirimo.
Indege ya American Eagle Flight 5342, yavaga i Wichita, Kansas, yerekeza i Washington. Yari iri mu nzira igihe kugwa ku kibuga cy’indege yaje kugongana na kajugujugu ya UH-60 Black Hawk yari itwaye abasirikare batatu. Mu ndege hari harimo abakozi bane n’abagenzi 60.
Perezida Donald Trump yemeje ko nta muntu warokotse, avuga ko ari "ijoro ryijimye cyane ku gihugu."
Umunyamabanga wa Gisirikare, Pete Hegseth, yatangaje ko abasirikare bari muri kajugujugu bari bafite uburambe mu gutwara indege. Yongeyeho ko iperereza ryatangiye kandi ibikorwa by’izi kajugujugu byahagaritswe by’agateganyo mu gihe cy’amasaha 48 kugirango habanze hakorwe iperereza ryimbitse nk'uko tubikesha Business Insider.
Sean Duffy, Umunyamabanga w’Ubwikorezi, yavuze ko nta kibazo cy’itumanaho cyari gihari hagati y’indege zombi. Indege ya American Airlines yabonetse yaguye mu mazi y’Umugezi wa Potomac, yacitsemo ibice bitatu.
Ishyirahamwe rya US Figure Skating ryemeje ko bamwe mu banyamuryango baryo bari muri iyo ndege bayiguyemo, barimo abakinnyi, abatoza n'imiryango yabo, bari bavuye mu mwiherero wabereye muri Wichita, Kansas. Bavuze ko "bababajwe cyane n'iyi mpanuka idasanzwe" kandi ko "bafashe mu mugongo imiryango y'ababuze ababo."
Iyi ni yo mpanuka ikomeye ya mbere y'indege ibaye ya gisivili muri Leta Zunze Ubumwe za Amerika kuva mu 2009 ubwo indege ya Colgan Air Flight 3407 yagwaga hafi ya Buffalo, New York, ikica abantu 49 bari bayirimo n'umuntu umwe waruri hasi.
Eng
RSS 
TANGA IGITECYEREZO