Ikipe ya APR FC yatangaje yasinyishije rutahizamu mushya ukomoka muri Burkina Faso, Cheick Djibril Ouattara waherukaga gutandukana na JS Kabylie yo muri Algeria.
Iyi kipe yabitangaje kuri uyu wa Kane tariki ya 23 Mutarama 2025 ibinyujije ku rubuga rwayo nyuma y'uko yari yageze mu Rwanda mu rukerera rwo kuri uyu wa Kane n'ubundi.
Rutahizamu Djibril Ouatara w'imyaka 25 yatangiriye gukina ruhago mu ikipe ya Vitesse FC 2016-2017 iwabo, mbere yo kuyivamo akajya muri ASF Bobo Douglas na yo y’iwabo mu 2017, aho ku myaka 19 yayifashije gutwara shampiyona 2017-2018 ari na we uyoboye abatsinze ibitego byinshi, dore ko yari afite 15.
Nyuma yaho yerekeje mufj RS Berkane yo muri Maroc iramugura ayibamo kugeza mu mpeshyi ya 2024 ubwo yayivagamo atangiye kubura umwanya wo gukina.
Cheick Djibril Ouattara yagiranye ibihe byiza na RS Berkane, kuko 2019-2020 batwaranye igikombe cya CAF Confederation Cup mu gihe batsindiwe ku mukino wa nyuma wacyo kabiri, 2018-2019 na 2023-2024, mu gihe banatwara ibikombe bibiri bya Throne Cup imbere muri Maroc 2020-2021 na 2021-2022.
Mu mpeshyi ya 2024 yasinyiye JS Kabylie yo muri Algeria amasezerano y’imyaka itatu, ariko yirukanwa tariki ya 6 Mutarama 2025 akinnyemo igice cy’umwaka, aho yari amaze gukina imikino umunani ya shampiyona atsinze igitego kimwe.
Mu 2019, uyu mukinnyi yahamagawe bwa mbere mu ikipe y’igihugu ya Burkina Faso y’abatarengeje imyaka 20, ubu akaba ari umwe mu bakinira iki gihugu mu ikipe nkuru amaze gukinira imikino 15.
Ni umukinnyi wa gatatu usinyiye APR FC muri uku kwezi kwa Mutarama nyuma y’Abanya-Uganda babiri bakina basatira banyuze mu mpande, ari bo Hakim Kiwanuka na Denis Omedi.
Ikipe y'Ingabo z'igihugu kugeza ubu iri ku mwanya wa kabiri muri Shampiyona y’u Rwanda, aho ifite amanota 31, ikarushwa atanu na Rayon Sports FC iyoboye. Iyi kipe kandi iri kwitegura umukino wa 1/2 cy’Igikombe cy’Intwari ifitanye na AS Kigali mu cyumweru gitaha.
Cheick Djibril Ouattara ashyira umukono ku masezerano
Cheick Djibril Ouattara asuhuzanya na Chairman wa APR FC nyuma yo gushyira umukono ku masezerano
Cheick Djibril Ouattara ni umukinnyi wa APR FC mu buryo bwemewe n'amategeko
Eng
RSS 
TANGA IGITECYEREZO