Rutahizamu mushya wa APR FC yageze mu Rwanda atangaza icyatumye ayerekezamo

Yasesekaye ku kibuga cy'indege i Kanombe mu rukerera rwo kuri uyu wa Kane, tariki ya 23 Mutarama 2025 aho yakiriwe na bamwe mu bayobozi b'iyi kipe. Ni nyuma yuko mu minsi yashize ari bwo byari byaravuzwe ko uyu rutahizamu yayisinyiye.

Cheick Djibril Ouattara aganira na B&B Kigali FM yavuze ko atari we uzarota atangiye gukinira APR FC. Yagize ati: "Si njye uzarota ntangiye gukinira APR FC, nakiniye amakipe yo muri Maroc no muri Algeria n’Ikipe y’Igihugu, Imana nimfasha nzaha APR FC byinshi birenzeho".

Yavuze ko impamvu yahisemo kwerekeza muri APR FC ari ukubera ko ari ikipe ifite umushinga ufatika. Yagize ati: "Ni ikipe ifite umushinga mwiza wankuruye. Hamwe n’abakinnyi bagenzi banjye n’abayobozi b’ikipe, nizeye ko tuzagera ku kintu gifatika".

Yavuze ko mbere atarazi u Rwanda gusa nyuma y'uko APR FC imwifuje akaba yaratangiye kugira byinshi arumenyaho ariko akaba yarasanze ari igihugu cyiza.

Cheick Djibril Ouattara yavuze ko yabonye ko APR FC ifite abafana benshi bityo ko Imana n'ibimufashamo bazaterwa ishema nawe.

Ati: "Nabonye ko ifite abafana benshi kandi nabonye ari abafana bashyigikra ikipe yabo. Imana n'ibimfashamo nizeye ko nzabatera ishema".

Cheick Djibril Ouattara w'imyaka 25 yasinyiye APR FC nyuma y'uko yari amaze gutandukana na JS Kabylie yo muri Algeria. Yakiniye kandi RS Berkane yo muri Maroc aho yatwaranye nayo ibikombe birimo Icya CAF Confederations Cup.

Uyu rutahizamu asanzwe anakinira ikipe y’igihugu ya Brukina Faso kuva tariki 24 Kanama 2018, aho amaze gukina imikino 14 yatsinzemo ibitego bibiri.

APR FC ni umukinnyi wa gatatu isinyishije muri uku kwezi kwa Mutarama nyuma y’Abanya-Uganda babiri bakina basatira banyuze mu mpande, ari bo Hakim Kiwanuka na Denis Omedi.

Rutahizamu wa APR FC yavuze ko icyatumye ayerekezamo ari ukubera umushinga mwiza ifite