Kepler WBBC yaguze umunya Cameroon wakinnye mu Bufaransa

Mu gihe habura iminsi mike ngo Shampiyona ya Basketball itangire, amakipe atandukanye arimo kwitegura mu buryo bukomeye hagamijwe kwigaragaza neza muri uyu mwaka w’imikino.

Kepler WBBC, ikipe iri kwitegura umwaka wayo wa kabiri mu marushanwa, yakomeje ibikorwa byo kwiyubaka izana Umunya-Cameroun Josiane Tcheumeleu. 

Uyu mukinnyi ukina mu mwanya w’Umu-Guard, yari asanzwe akinira FAP yo mu gihugu cye cya Cameroon aho yagaragaje ubuhanga budasanzwe.

Josiane kandi afite amateka akomeye kuko yabanje gukinira Avenir de Rennes Basket mu Bufaransa. 

Yamenyekanye cyane ubwo yitabiraga imikino ihuza ibihugu bikoresha Igifaransa, yabereye i Kinshasa muri Repubulika Iharanira Demokarasi ya Congo mu 2023, aho yerekanye impano ye ikomeye mu mukino wa Basketball.

Kuri ubu, uyu mukinnyi yamaze kugera i Kigali aho ari gukorana imyitozo na bagenzi be mu rwego rwo kwitegura neza Shampiyona izatangira ku wa 25 Mutarama 2025.

Mu mwaka ushize w’imikino, Kepler WBBC yagaragaje imbaraga nyinshi, isoza ku mwanya wa gatatu. 

Uyu mwaka barifuza kugera ku ntsinzi kurushaho, bakaba biteguye guhura na The Hoops mu mukino wa mbere wa Shampiyona uzabera muri Kepler College ku wa Gatandatu tariki ya 25 Mutarama 2025 saa Cyenda.

Umunya Cameroon Josiane Tcheumeleu yiyongereye mu bakinnyi Kepler WBBC izifashisha muri shampiyona