Police yo mu gihugu cy'u Bwongereza yataye muri yombi umwana ufite imyaka 17 wahoteteye umugore wa rutahizamu wa Arsenal, Kai Havertz yifashishije imbuga nkoranyambaga.
Mu minsi yashize ni bwo Manchester United yasezereraga Arsenal mu mikino ya FA Cup iyitsinze penariti 5-3. Kuri uyu mukino, Kai Havertz ni umwe mu barase penariti aho yayiteye igakurwamo Altay Bayindir akaba yari yagiye anarata uburyo bwashoboraga kuvamo ibitego.
Ibi ni byo byaje gutuma bamwe mu bafana ba Arsenal bandikira ubutumwa umugore w'uyu mukinnyi bamutuka ndetse kugeza n'aho bamuteye ubwoba ku mwana wabo utaravuka biturutse ku kuba umugabo we yagize uruhare mu gutuma ikipe bihebeye isezererwa.
Sophia Havertz yafashe ifoto ya bumwe mu butumwa yandikiwe n'aba bafana abushyira ku rukuta rwe rwa Instagram maze ayiherekesha amagambo agira ati: "Ku muntu utekereza ko ari byiza kwandika ibintu nk'ibi, birantangaje. Nizere ko witeye isoni".
Nyuma y'aho Polisi yo mu Bwongereza yatangiye gukora iperereza ku bahohoteye uyu mugore bamwandikira ubu butumwa, ndetse na Arsenal nayo ishyiraho umuntu wayo wihariye kugira ngo amenye abantu bihishe inyuma y'ibi bintu.
Ibinyamakuru birimo The Athletic na ESPN byanditse ko Police yafashe umwana w'imyaka 17 ukekwaho gukora iki cyaha. Uyu mwana utatangajwe amazina mu rwego rwo kumurinda bijyanye n'uko ataruzuza imyaka y'ubukure, akomoka mu gace ka St Albans gaherereye mu murwa mukuru i London.
Kai Havertz yerekeje mu ikipe ya Arsenal mu mpeshyi ya 2023 avuye muri Chelsea, akaba amaze kuyikinira imikino 80 aho yatsinzemo ibitego 27 mu marushanwa yose. Muri uyu mwaka w'imikino, Kai Havertz amaze gukinira Arsenal imikino 22 muri Premier League akaba amaze gutsinda ibitego 8.
Kai wa Arsenal hamwe n'umugore we Sophia
Eng
RSS 
TANGA IGITECYEREZO