APR FC yahakanye amakuru yerekezaga Niyigena Clement muri Tunisia

Iyi kipe yabihakanye ibinyujije ku rubuga rwayo aho yagize iti: "Ikipe ya APR FC irahakana amakuru yiriwe acicikana ku mbuga nkoranyambaga avuga ko umukinnyi wacu Niyigena Clement agiye kwerekeza mu ikipe yo mu gihugu cya Tunisia".

Iyi kipe y'Ingabo z'igihugu yakomeje ivuga ko nta kimenyetso cyerekana ko Olympique de Béja yifuza uyu myugariro bijyanye nuko nta baruwa cyangwa ikindi gikorwa iyi kipe yigeze ikora kibigaragaza.

Yagize iti "Kugeza ubu nta cyerekana ko iyo kipe imwifuza kuko nta baruwa cyangwa ikindi gikorwa kigaragara ko iyo kipe imwifuza, uretse ibivugwa hanze, kandi iyo ikipe yashimye umukinnyi wacu bifite inzira binyuramo dore ko APR FC ari ikipe ikora Kinyamwuga, kandi ikaba ifungurira amarembo abakinnyi bayo bifuzwa n'andi makipe kuko biba biri mu iterambere ry’umukinnyi muri rusange".

Niyigena Clement yongereye amasezerano muri APR FC mu mpeshyi y'umwaka ushize nyuma yuko yari yabanje kuyigora bitewe nuko yifuzaga amafaranga menshi ndetse akaba yaranavugaga ko afite amakipe yo hanze y'u Rwanda amwifuza nkuko amakuru abivuga.

Uyu mukinnyi yageze muri APR FC muri 2022 avuye muri mukeba wayo [Rayon Sports] yari yaragezemo muri 2019 avuye muri Marine FC atijwe. Mbere yo kujya muri Marine FC yakinaga mu ikipe y'abato ya APR FC izwi ku izina rya Intare FC.

APR FC yahakanye amakuru yerekezaga Niyigena Clement muri Tunisia