Mugisha Bonheur yongeye gutabara! Uko Abanyarwanda bakina hanze bitwaye mu Cyumweru gishize

Duhereye muri Kenya kuwa Gatandatu ikipe ya AFC Leopards ikinamo Gitego Arthur yatsinzwe na FC Talanta ibitego 4-2. Kuri uyu mukino ntabwo uyu rutahizamu w'Umunyarwanda yabanje mu kibuga ndetse nta n'ubwo yigeze abanza no mu kibuga.

Kugeza ubu AFC Leopards iri ku mwanya wa 8 ku rutonde rwa shampiyona ikazasubira mu kibuga ikina na KCB kuwa Gatatu w'iki Cyumweru.

Muri shampiyona y'icyiciro cya mbere muri Libya, kuwa Gatanu ikipe ya Al Ahly Tripoli ikinamo Manzi Thierry yatsindaga Al Watan ibitego 3-0. Kuri uyu mukino ntabwo uyu myugariro yigeze akoreshwa bitewe n'ikibazo cy'imvune afite. 

Kugeza ubu Al Ahly Tripoli iri ku mwanya wa mbere ku rutonde rwa shampiyona ikaba izasubira mu kibuga ikina na Al Khuma kuwa Kane w'iki Cyumweru.

Ku munsi wejo ku Cyumweru muri shampiyona y'icyiciro cya mbere muri Tunisia, ikipe ya Stade Tunisien ikinamo Mugisha Bonheur yanganyaga na Zarzis igitego 1-1.

Uyu mukinnyi w'Amavubi yari yabanje mu kibuga ndetse ni nawe watsinze iki gitego cy'ikipe ye ku munota wa 21. Ni igitego cya 3 Mugisha Bonheur atsinze kuva yagera muri iyi kipe.

Stade Tunisien iri ku mwanya wa mbere ku rutonde rwa shampiyona izasubira mu kibuga ikina na Metlaoui tariki ya 1 z'ukwezi kwa 2.

Muri iyi shampiyona kandi ku Cyumweru ikipe ya Olympique de Beja ikinamo Ishimwe Anicet yatsindwaga na ES Sahel ibitego 2-0.

Uyu mukinnyi w'Umunyarwanda yari yabanje mu kibuga ariko aza gusimbuzwa ku munota wa 57. Olympique de Beja iri kumwanya wa 8 ku rutonde rwa shampiyona izasubira mu kibuga ikina na Esperance kuwa Gatatu w'iki Cyumweru.

Muri shampiyona y'icyiciro cya mbere muri Afurika y'Epfo, ku Cyumweru ikipe ya Kaizer Chiefs ikinamo Ntwari Fiacre yatsinze Sekhukhune United F.C igitego 1-0. Ntabwo uyu munyezamu w'Amavubi yari yabanje mu kibuga ariko yari ku ntebe y'abasimbura. 

Kugeza ubu Kaizer Chiefs iri kumwanya wa 5 ku rutonde rwa shampiyona ikazasubira mu kibuga ikina na Free Agents ku Cyumweru.

Muri shampiyona y'icyiciro cya mbere muri Azerbaijan, kuwa Gatandatu ikipe ya FC Zira ikinamo Mutsinzi Ange yatsinze Araz-Naxçıvan igitego 1-0. Uyu myugariro w'Amavubi yabanje mu kibuga ndetse nta n'ubwo yigeze asimbuzwa. 

Kugeza ubu FC Zira iri kumwanya wa 3 muri shampiyona ikazasubira mu kibuga ikina na Samaxi kuwa Gatanu.

Muri iyi shampiyona kandi kuwa Gatandatu ikipe ya Sabail iheruka gusinyisha Nshuti Innocent yatsinzwe na Sumqayit ibitego 2-0. Uyu rutahizamu w'Amavubi wakinaga umukino we wa mbere yinjiye mu kibuga asimbuye ku munota wa 71.

Kugeza ubu Sabail iri ku mwanya wa nyuma ku rutonde rwa shampiyona ikazasubira mu kibuga ikina na Kepez kuwa Gatandatu w'iki Cyumweru.

Muri shampiyona y'icyiciro cya mbere muri Cyprus, ku Cyumweru ikipe ya AEL Limassol ikinamo Imanishimwe Emmanuel Manguende yanganyaga na Ethnikos 0-0. Uyu myugariro w'Amavubi ntabwo yari no ku ntebe y'abasimbura. 

AEL Limassol iri ku mwanya wa 9 ku rutonde rwa shampiyona izasubira mu kibuga ikina na Nea Salamina kuwa Gatanu.

Kuwa Gatandatu muri shampiyona y'icyiciro cya kabiri mu Bubiligi, ikipe ya Raal La Louviere ikinamo Samuel Gueulette yanganyaga na RSCA Futures U 23 ibitego 2-2.

Uyu mukinnyi w'Amavubi ntabwo yari yabanje mu kibuga ndetse nta nubwo yari ku ntebe y'abasimbura. Raal La Louviere iri ku mwanya wa kabiri ku rutonde rwa shampiyona izasubira mu kibuga ikina na Club NXT U 23 ku Cyumweru.

Muri shampiyona y'icyiciro cya mbere mu Bubiligi,kuwa Gatandatu ikipe ya Beerschot ikinamo Hakim Sahabo yatsinzwe na Club Brugge ibitego 4-2.

Uyu mukinnyi w'Umunyarwanda wakinaga umukino we wa mbere muri iyi kipe yinjiye mu kibuga asimbuye ku munota wa 46. 

Kugeza ubu Beerschot iri ku mwanya wa nyuma ku rutonde rwa shampiyona ikaba izasubira mu kibuga ikina na Royale Union Saint-Gilloise ku Cyumweru.

Nshuti Innocent yakinaga umukino we wa mbere muri Sabail 

 Hakim Sahabo nawe yakinaga umukino we wa mbere muri Beerschot aheruka gutizwamo 

Mugisha Bonheur yafashaga ikipe ye kubona inota rimwe