Umwana w’imyaka 15 yitabye Imana akina umupira w’amaguru

Umwana w’imyaka 15 wo mu mujyi wa Manchester, witwaga Jake Lawler, yitabye Imana tariki ya 5 Ugushyingo umwaka ushize, ubwo yari ari gukina umupira w’amaguru ku ishuri rya Ashton on Mersey riherereye mu gace ka Sale, Trafford. 

Nk’uko urukiko rwa Stockport rwabigaragaje, Jake yari yagiye kwa muganga mu kwezi kumwe mbere y’urupfu rwe, agaragaza ikibazo cyo guhumeka nabi, ubwo yari arimo gukina mu kibuga yaje kugwa hasi. Nyuma yo kugwa mu kibuga, abaganga bagerageje kumutabara ariko biranga, ashiramo umwuka ako kanya. 
 

Isuzuma ryakorewe umurambo ryagaragaje ko yazize ”biventricular arrhythmogenic cardiomyopathy”, indwara y’umutima idakunze kuboneka kandi ikomoka ku guhindagurika k’uturemangingo. Iyi ndwara ituma umuntu ahumeka umwuka muke, umutima ugatera vuba ndetse no guhagarara igitaraganya nk'uko tubikesha Daily Mail. 
 

Ishuri rya Sale High School, aho Jake yigaga, ryatangaje ko ryifatanyije n’umuryango n’inshuti ze muri ibi bihe bikomeye. Mu itangazo ryashyizwe hanze tariki ya 10 Ukuboza, ishuri ryavuze ko “ryahungabanyijwe bikomeye no kubura umwana wacu ukundwa, Jake Lawler, wapfuye mu buryo bubabaje.” 

Umuryango wa Jake washyizeho urubuga rwo kwibuka no gukusanya inkunga izakoreshwa mu bikorwa by’ubukangurambaga ku ndwara z’umutima ziterwa n’imihindagurikire y'uturemangingo, binyuze mu muryango CRY (Cardiac Risk in the Young). Amafaranga azakusanywa azifashishwa  mu bushakashatsi, ibikorwa byo gupima ndetse no gufasha imiryango yahuye n’ibi bibazo.