Hejuru ya 90% by’abana bajya mu mihanda baba bafite ababyeyi

Ni ibyatangarijwe mu kiganiro Waramutse Rwanda cya RTV, kigaruka kuri gahunda yo gusubiza abana mu miryango n'ingamba zashyizweho mu kubishyira mu bikorwa.  

Ngwije Jean Népomuscène ukora mu Kigo cy’Igihugu cy’Igororamuco, yagaragaje ko hejuru ya 90% bajya mu mihanda baba bafite ababyeyi.

Yagize ati: "Ikibazo gishingiye ku muryango, abenshi muri bo batubwira ko amakimbirane y’iwabo ari yo yatumye bava iwabo bakagenda.''

Mukamana Monique ushinzwe kurinda Uburenganzira bw’Umwana mu Kigo cy’Igihugu gishinzwe gukurikirana imikurire no kurengera umwana (NCDA), yavuze ko abana benshi bajya mu muhanda kubera ibibazo byo mu miryango.

Ati: “Hari ibindi birimo ubusinzi n’ubuzererezi. Ukabona umugore ari mu kabari nka saa Tanu kandi afite abana.”

Impuguke mu bijyanye n’umuryango, Ingabire Jeanne d’Arc, yavuze ko ababyeyi bakwiye kuzirikana ko inshingano zabo ku mwana zidasimburwa. Ati: “Inshingano z’ababyeyi ni ebyiri, ni ukubyara no kurera. Ni inshingano badasimburwaho. Igihe umubyeyi akiri mu buzima ni we wenyine wo kwibyarira no kwirerera.’’

Ingabire yavuze ko ababyeyi badakwiye gukoreza abandi umutwaro wo kubarerera. Ati: “Ababyeyi barekuye inshingano. Si bose ariko biteye ubwoba kubona nzi neza ko nabyaye ariko sinemere kurera."

Yakomeje avuga ko abantu badakwiye guhihibikanira iterambere ry’ibintu, bibagirwe iry’abantu.

Ati: "Umwana ahabwa ibyo kurya, kunywa, imyambaro, ibyo byose n’undi muntu yabimuha ariko urukundo rw’umubyeyi nta wundi warumuha. Umwana nkwiye kumutoza icyo nshima, nkanamubuza icyo ngaya."

Mu mwaka ushize, Umuryango urengera abana mu Rwanda, SOS Children’s Village, watangaje ko 90% by’abana bagaragara mu mihanda, baba barahunze ibibazo byo mu miryango bavukamo.