Polisi yatangiye gukora iperereza ku bahohoteye umugore wa rutahizamu wa Arsenal

Mu Cyumweru gishize ni bwo ikipe ya Manchester United yasezereraga Arsenal mu mikino ya FA Cup iyitsinze penariti 5-3. Kuri uyu mukino Kai Havertz ni umwe mu barase penariti aho yayiteye igakurwamo Altay Bayindir ndetse akaba yari yagiye anarata uburyo bwashoboraga kuvamo ibitego.

Ibi ni byo byaje gutuma bamwe mu bafana ba Arsenal bandikira ubutumwa umugore w'uyu mukinnyi bamutuka ndetse kugeza naho bakuteye ubwoba ku mwana wabo utaravuka biturutse kuba umugabo we yagize uruhare mu gutuma ikipe bihebeye isezererwa.

Sophia Havertz yafashe ifoto ya bumwe mu butumwa yandikiwe n'aba bafana ayishyira ku rubuga rwe rwa Instagram maze ayiherekesha amagambo agira ati " Ku muntu utekereza ko ari byiza kwandika ibintu nkibi, birantangaje. Nizere ko witeye isoni".

Kuri ubu nkuko The Athletic yabyanditse Polisi yo mu Bwongereza yatangiye gukora iperereza ku bahohoteye uyu mugore bamwandikira ubu butumwa. Ni mu gihe ikipe ya Arsenal nayo yashyizeho umuntu wayo wihariye kugira ngo amenye abantu bihishe inyuma y'ibi bintu.

Kugeza ubu muri uyu mwaka w'imikino Kai Havertz amaze gukinira Arsenal imikino 27 mu marushanwa yose akaba yaratsinzemo ibitego 12.

Umugore wa Kai Havertz yakorewe ihohoterwa nyuma yuko umugabo we arase penariti