Intego EAC yihaye yo gukoresha ifaranga rimwe izagerwaho ryari?

Ni ibyo aba Badepite bahagarariye u Rwanda mu Nteko Ishinga amategeko y'Umuryango wa Afurika y'Iburasirazuba, EALA, batangarije mu ruzinduko bagiriye muri Sena y'u Rwanda muri iki Cyumweru, aho bagaragaje bimwe mu byagezweho mu myaka 25 u Rwanda rumaze muri uyu muryango ndetse n'ingamba zafashwe ngo ibihugu biwugize birusheho guhuza mu rwego rwa politiki bityo n'inyungu zibashe kugera ku baturage bawo.

Uwari uyoboye iri tsinda, Hon. Fatuma Ndangiza yavuze ko hari amabwiriza aherutse gushyirwaho n'inama y'Abakuru b'Ibihugu bigize  uyu muryango arimo kunozwa kugira ngo ikoreshwa ry'ifaranga rimwe nka EAC rizabe ryatangiye mu 2031 nk'uko biri mu mihigo y'uyu muryango.

Ati: "Hari ibigo bigomba kujyaho, ibyo bigo Inteko Ishinga Amategeko ya EALA yashyizeho amategeko, ariko ku rwego rw'Abaperezida hari ayo bagomba kwihutira gusinya, ariko hari n'ibyo tugomba kunoza muri ziriya nkingi za mbere uko ari ebyiri cyane cyane mu isoko rusange, ubona tugisindagira tutihuta. Kandi kugira ngo ririya faranga turigereho ziriya nkingi ebyiri tugomba kuba twazigezeho hafi 100%."

Kuva mu 2013, EAC yashyizeho itsinda, rigomba gukora inyigo yo kugaragaza uko ibihugu b'uyu muryango byashyiraho ifaranga rimwe rihuriweho ryajya ryifashishwa mu bikorwa by’ubucuruzi no guhererekanya amafaranga.

Mu 2023, Guverineri wa Banki Nkuru y’Igihugu [BNR], John Rwangombwa, yavuze ko hakiri urugendo rurerure rwo gushyiraho ifaranga rimwe rihuriweho n’ibihugu bigize Umuryango wa Afurika y’Iburasirazuba, EAC, cyane ko hari byinshi bigomba gukorwa bitarashyirwa mu bikorwa.

Ni ukuvuga ko byagombaga kujyana no gushyiraho Banki ya EAC, nk’uko habaho Banki Nkuru y’Igihugu. Iyo banki y’akarere ni yo yari guhabwa inshingano zo kugenzura politiki y’ifaranga mu Karere n’izindi zirimo kubika amafaranga ya za banki z’ibihugu binyamuryango.

Raporo yakozwe n’iryo tsinda yagaragaje imiterere y’iryo faranga ndetse nyuma haza no gukorwa ubukangurambaga ku ikoreshwa ryaryo mu baturage batuye Akarere, kugeza ubwo ibihugu byari byemeje ko mu 2024, iryo faranga ryagombaga kuzaba ryatangiye gukoreshwa.

Guverineri Rwangombwa wari mu Nteko Ishinga Amategeko ku wa 27 Ugushyingo 2023, yabajijwe ibijyanye n’iri faranga rimwe rya EAC, yavuze ko hatanzwe ingengabihe nshya, aho byitezwe ko rizatangira gukoreshwa mu 2031.

Ati: “Ariko haracyari byinshi bigomba gukorwa mbere y’uko twagira ifaranga rimwe na banki imwe, ubundi hari uguhuza amasoko bisesuye, amasoko mu bihugu byacu ntibirakunda, urujya n’uruza rw’ibicuruzwa, urw’abantu [...] ibyo byose ntibirashoboka mu buryo bushimishije.”

Yavuze ko hakiri urugendo rurerure ariko hari icyizere ko bizashoboka hagendewe kuri iyo ngengabihe nshya yashyizweho yo mu 2031 kugira ngo ibihugu bibanze byitegure neza.

Gushyiraho ifaranga rimwe muri EAC, byakunganira gahunda zitandukanye zashyizweho mu rwego rw’ubukungu bw’uyu muryango zirimo guhuza za gasutamo no kunoza uburyo bwo kwishyurana.

Ni ibintu kandi byafasha mu kugabanya ikiguzi bitwara mu guhamagarana kuri telefonie aho nk’umuntu uri muri Kenya yajya abasha guhamagara uri mu Burundi cyangwa mu Rwanda bitamuhenze.

Biteganyijwe ko mu gihe inkingi yo gukoresha ifaranga rimwe izaba imaze kugerwaho hazakurikiraho guhuza politiki z’ibihugu ndetse no kwihuza kwa za leta n’ibihugu.

EAC mu nzira zo gukabya inzozi zo gukoresha ifaranga rimwe