Cristiano Ronaldo yemeye kongera amasezerano muri Al-Nassr

Aya masezerano mashya azamugeza mu mwaka wa 2026, aho azakomeza gukinira iyi kipe yo muri Saudi Arabia.

Nk’uko byatangajwe n’ibinyamakuru Al Khabar na O Jogo, Ronaldo azakomeza guhembwa miliyoni £173 ($211 miliyoni) buri mwaka, akomeze kuba ku isonga mu kwinjiza amafaranga menshi kurusha abandi bakinnyi. Uyu mushahara ushimangira ko, nubwo afite imyaka 39, agifite agaciro gakomeye n’inyota yo kuguma gukina ruhago.

Nubwo Ronaldo byavugwaga ko ashobora kwerekeza muri Al-Hilal ya Neymar, yahisemo kuguma muri Al-Nassr aho yifuza guhangana n’aya makipe akomeye muri Saudi Pro League. Byongeye, yasabye ko ikipe ye ishyiramo imbaraga mu kugura abandi bakinnyi b’inzobere mu isoko ryo muri Mutarama kugira ngo bahatanire ibikombe bikomeye ku rwego mpuzamahanga.

Ronaldo amaze gukina imikino 90 muri Al-Nassr, atsindamo ibitego 81 ndetse atanga imipira 18 yavuyemo ibitego. Uyu musaruro ugaragaza ko, nubwo ari mu myaka y’imusozo mu mwuga we, akiri umukinnyi udashidikanywaho mu gusatira no gutsinda ibitego.

Aya masezerano mashya azatuma Ronaldo aguma muri Saudi Arabia, aho umupira w’amaguru uri kugenda ubona agaciro mu rwego mpuzamahanga. Uretse kuba Ronaldo ari ikirangirire ku kibuga, yanahinduye uburyo shampiyona ya Saudi Arabia ireberwa ku isi, bituma ibindi byamamare bifatwa nk’icyitegererezo bikomeza kwerekeza muri iki gihugu.

Cristiano Ronaldo akomeje kwerekana ko atari gusa umukinnyi, ahubwo ari ikirango cy’umupira w’amaguru ku rwego rw’isi. Imyaka ye mu kibuga ikomeje kuba umusemburo w’ibyishimo ku bafana be n’abakunda umupira w’amaguru muri rusange.

Kuva Cristiano Ronaldo yajya uri Saudi Alabia abandi bakinnyi bahise bamukurikira harimo Neymar Junior, Karim Benzema, Ngolo Kante, ndetse n’abandi.

Cristiano Ronaldo yemeye kongera amasezerano muri Al-Nassir