Yajemo kwica! Amakimbirane hagati ya Gen Muhoozi na Bobi Wine yafashe indi ntera

Mu butumwa bwo ku wa 5 Mutarama 2025, Muhoozi yavuze ko ari Se, Perezida Museveni, umaze imyaka 39 ku butegetsi, ariwe wenyine umubuza  guca umutwe Bobi Wine.

Bobi Wine wigeze kuba icyamamare mu muziki, yahindutse umunyapolitiki ukunzwe cyane mu gihugu, ndetse yabaye uwa kabiri mu matora ya Perezida ya 2021.Nyuma yo kubona aya magambo ya Muhoozi, yanditse kuri X ati: "Aya magambo ntakwiye gufatwa nk’ubusa, kuko inshuro nyinshi bamaze kugerageza kunyica."

Gen Muhoozi yahise amusubiza ati:"Ndumva wivovota, ariko ubanze usubize amafaranga twakuguranye mbere y’uko nkurangiza."

Uyu mugaba w’ingabo yashatse kugaragaza ko Bobi Wine yaba yarahawe amafaranga na leta kugira ngo ace intege abatavuga rumwe nayo, ikirego Bobi Wine yahakanye kenshi.

Gen Muhoozi si ubwa mbere yanditse amagambo akurura impaka. Mu 2022, yari yateje urunturuntu ubwo yatangaje ko Uganda ishobora gutera Kenya, bigatuma Perezida Museveni asaba imbabazi mu izina rye.

Mu minsi ishize, amagambo ye yongeye kuzamura impungenge, ndetse ibihugu bya Repubulika Iharanira Demokarasi ya Congo na Sudani bisaba ibisobanuro kuri bimwe mu byo yari yanditse.

Bobi Wine nubwo yakomeje kwamagana ibyavuye mu matora ya 2021 avuga ko atakoreshejwe mu mucyo, yagumye ku isonga ry’abakomeza gushyira igitutu ku butegetsi bwa Museveni.

Abashinzwe kuvugira igisirikare cya Uganda ndetse n’abakozi ba leta birinze kugira icyo batangaza kuri aya magambo ya Gen Muhoozi, ndetse BBC dukesha iyi nkuru ntiyabashije kuvugana nabo. Ariko amakimbirane hagati ya Muhoozi na Bobi Wine akomeje kuba inkuru ikurura ibitekerezo byinshi mu gihugu no hanze yacyo.

Gen Muhoozi yahamije ko iyo Se aza kuba adahari aba yaraciye umutwe Bobi Wine

Bobi Wine yasabye ko aya magambo ya Gen Muhoozi atarenzwa ingohe ngo kuko ari kenshi  bagerageje kumwica Imana igakinga ukuboko