Umutoza wa Liverpool yatangaje amagambo akomeye mbere y'uko akina na Man United

Liverpool iri ku mwanya wa mbere ku rutonde rwa shampiyona ifite amanota atandatu imbere y’andi makipe, irashaka igikombe cya 20 cya shampiyona ya Premier League, cyayishyira ku rwego rumwe na Manchester United ifite ibi bikombe inshuro nyinshi mu mateka.

Manchester United yo, iri ku mwanya wa 14 nyuma yo gutsindwa imikino itanu muri itandatu iheruka ya shampiyona, nyuma yo kubona umutoza mushya Ruben Amorim. Arne Slot ashimangira ko atazirara na gato kuri uyu mukino, n’ubwo ikipe bahanganye iri hasi ku rutonde.

Slot yagize ati: “United ifite abakinnyi beza kurusha uko umwanya ubivuga.” Mu kiganiro n’itangazamakuru cyabaye ku wa Gatanu, Slot yavuze ko adashobora kuruhutsa abakinnyi be kuri uyu mukino.

Yakomeje ati “Oya, sinteze kuruhutsa umukinnyi n’umwe kuko ari umukino ukomeye cyane. Navuze ibi mbere y’umukino wa mbere ubwo twatsindaga United ibitego 3-0 kuri Old Trafford, kandi nshobora kongera kubivuga.  Bafite abakinnyi beza cyane kurusha uko umwanya bariho ubyerekana muri iyi minsi.”

Slot yongeyeho ko bizatwara igihe kugira ngo Ruben Amorim azamure urwego rw’abakinnyi be, ariko yizeye ko Manchester United izazamuka ku rutonde.

Yagize ati: “Numva ko bishobora gufata igihe kugira ngo Ruben Amorim abashe gukura ubushobozi bwose mu bakinnyi be, ariko nta gushidikanya bazazamuka. Ni ikipe ikomeye cyane kurusha uko urutonde rwa shampiyona rubivuga muri iki gihe.”

Slot, wavuye mu Buholandi aje gutoza Liverpool, yagaragaje impuhwe ku mutoza mugenzi we Ruben Amorim, wagiye muri Manchester United avuye muri Sporting Lisbon mu Ugushyingo. 

Ati: “Numva akababaro ka buri mutoza kuko twese tuzi igitutu uyu mwuga utwongerera. Ntabwo byihariye kuri we, biradukurikirana twese, yaba muri Premier League cyangwa ahandi ku isi.”

Umutoza wa Liverpool yatangaje ko n'ubwo Man United iri mu bihe bibi, ifite ubushobozi bwo guhangana na Liverpool

Ku cyumweru Liverpool iramanuka mu kibuga na Man United