Hakim Sahabo mu nzira zerekeza mu ikipe nshya

Nk'uko ibinyamakuru bitandukanye byo mu Bubiligi bibitangaza birimo icyitwa Walfoot.be , ikipe ya Standard De Liege uyu mukinnyi asanzwe akinamo yamaze kwemeranya na Beerschot kumubatiza kuzageza uyu mwaka w'imikino urangiye.

Ibi bigiye kuba nyuma y'uko mu mwaka ushize w'imikino aribwo Hakim Sahabo yari yazamuwe mu ikipe ya Standard de Liège nkuru akuwe mu bato ndetse akajya akinishwa ku mikino itandukanye aho yanabanzaga mu kibuga gusa kuva uyu mwaka w'imikino utangiye akaba yaraje kugira ikibazo cy'imvune ndetse bikanamuviramo gutakaza umwanya wo gukina aho byarangiye yongeye no gusubizwa mu ikipe y'abato.

Beerschot igiye gutizwa uyu mukinnyi w'imyaka 19 ukina mu kibuga hagati asatira,ku ikubitiro yari yifuje kumugura gusa biza gukomwa mu nkokora n'uko yafatiwe ibihano byo kutemererwa kugura abakinnyi.

Iyi kipe isanzwe ikina muri shampiyona y'icyiciro cya mbere mu Bubiligi aho iri no ku mwanya wa nyuma kugeza ubu. Umutoza wayo ni Dirk Kuyt wakiniye ikipe ya Liverpool naho nyirayo akaba ari umuherwe ukomoka muri Arabia Saudite witwa Abdullah bin Mossad bin Abdul Aziz Al Saud.

Hakim Sahabo yerekeje muri Standard de Liège mu mpeshyi y'umwaka wa 2023 asinya amasezerano y'imyaka 3 avuye mu ikipe ya Lille y'abato.