Trent Alexander-Arnold mu ihurizo rikomeye hagati ya Liverpool na Real Madrid y’inzozi ze

Liverpool, ikipe Trent Alexander-Arnold yakuriyemo, yagaragaje ubushake bwo kugumana uyu mukinnyi w’imyaka 25, imusaba ko yakongera amasezerano y’imyaka itanu agera kuri Miliyoni £78. Ibi bivuze ko umushahara we uzamurwa ukagera kuri £300,000 buri cyumweru, bikaba ari icyerekana ko bashaka ko aguma muri iyi kipe.

Mu gihe Liverpool ishaka ko Trent Alexander-Arnold agumana nayo, ikipe ya Real Madrid yo yamaze gutangira kumushakisha, by’umwihariko ishaka kumwegukana mu isoko ryo muri Mutarama.

Real Madrid yiteguye gutanga miliyoni £20 kugira ngo imwegukane mbere y'uko amasezerano ye arangira mu mpeshyi. Icyakora, Liverpool yamaze kwanga uyu mugambi, ndetse na Alexander-Arnold ubwe yagaragaje ko atifuza kuva mu ikipe hagati mu mwaka w’imikino, cyane ko Liverpool iri ku mwanya wa mbere muri Premier League.

Raporo zerekana ko uyu mukinnyi adashaka guhinduranya ikipe hagati mu mwaka, ariko amahirwe menshi akagaragaza ko mu mpeshyi ubwo azaba arimo gusoza amasezerano ye, ashobora kuva muri Liverpool.

Mu byo Liverpool iri gusezeranya Trent Alexander-Arnold harimo n’icyifuzo cyo kuzaba kapiteni w’ikipe mu gihe kizaza, aho ashobora gusimbura Virgil van Dijk, kabuhariwe mu bwugarizi bwayo.

Trent Alexander-Arnold  yakunze ugaragaza inyota yo gukina muri Real Madrid kuko bishobora kumufasha kugera ku rundi rwego rw’umwuga we, ariko bikaba bishobora gusiga icyuho gikomeye muri Liverpool.

Mu gihe Trent Alexander-Arnold  yahitako kuguma mu ikipe ya Liverpool yakuriyemo byamufasha gukomeza kuba umunyabigwi wayo, agakomeza kubaka amateka nk’umukinnyi uzahora yibukwa nk’umwe mu nkingi za mwamba z’iyi kipe.

Trent ufite inzozi zo gukinira Real Madrid Liverpool yamusabye kongera amasezerano y'imyaka itanu