Premier League: Manchester United yakomeje kugwirirana biyishyira ku mwanya wa 14

Ni mu mukino wakinwe kuri uyu wa Kane taliki ya 26 Ukuboza 2024 Saa moya n'iminota 30 kuri Molineux Stadium.

Umukino watangiye ikipe ya Manchester United iri hejuru mu bijyanye no guhererekanya umupira ndetse ari na ko abakinnyi bayo nka Bruno Fernandes bagerageza uburyo imbere y'izamu gusa ba myugariro ba Wolves bakaba ibamba.

Ku munota wa 19 iyi kipe bitirira amashitani atukura yashoboraga kubona igitego ku ishoti riremereye ryarekuwe na Diogo Dalot ku mupira yahawe na Bruno Fernandes gusa Jose Sa arishyira muri koroneri.

Ikipe ya Wolves nayo yaje kubona uburyo buremereye imbere y'izamu ku mupira wahinduwe na Nelson Semedo maze Jorgen Strand Larsen ashyiraho umutwe ariko Andre Onana aratabara awushyira muri koroneri.

Wolverhampton Wanderers yakomeje kubona uburyo bwashoboraga guteza ibibazo nk'aho Nelson Semedo yarekuye ishoti riremereye ari mu kibuga hagati gusa umupira ugashyirwa muri koroneri.

Igice cya mbere cyarangiye amakipe yombi anganya 0-0. Igice cya kabiri cyaje Manchester United ihura n'ibibazo umukinnyi wayo, Bruno Fernandes abona ikarita ya kabiri y'umuhondo ku ikosa yakoreye Nelson Semedo bihita bibyara umutuku.

Nyuma yuko Manchester United isigaranye abakinnyi 10 mu kibuga yatangiye kurushwa mu buryo bugaragara cyane. 

Ku munota wa 58 ikipe ya Wolves yaje gufungura amazamu ku gitego cya Matheus Cunha kuri koroneri yateye iragenda iruhukira mu izamu.

Wolves yakomeje gushaka igitego cya kabiri binashoboka ko yakibona ariko abarimo Harry Maguire bakaba ibamba. 

Mu minota ya 80 Manchester United yasatiriye cyane ishaka uko yakwishyura ikanabona uburyo nk'aho Casemiro yazamuye umupira mwiza Alejandro Garnacho agashyiraho umutwe gusa ukanyura hejuru y'izamu gato cyane.

Mbere yuko umukino urangira Wolves yabonye igitego cya kabiri gitsinzwe na Hee Chan ku mupira yahawe na Matheus Cunha.

Umukino warangiye Manchester United itsinzwe ibitego 2-0 ihita ijya ku mwanya wa 14 n'amanota 15 ku rutonde rwa shampiyona naho Wolves yo ijya ku mwanya wa 17 n'amanota 15.

Abakinnyi ba Wolves bishimira intsinzi