Umutoza w'ikipe y'igihugu y'u Rwanda, Amavubi, Jimmy Mulisa na Kapiteni, Muhire Kevin bijeje abanyarwanda gukosora amakosa imbere y'ikipe y'igihugu ya Sudani y'Epfo mu mukino wo kwishyura w'ijonjora rya nyuma mu gushaka itike y’Igikombe cya Afurika cy’Abakina imbere mu bihugu byabo (CHAN 2024).
Ibi babigarutseho mu kiganiro n'itangazamakuru cyabaye kuri uyu wa Gatanu tariki ya 27 Ukuboza 2024 gutegura uyu mukino wo Amavubi azakiramo Sudani y'Epfo ku munsi w'ejo kuwa Gatandatu Saa Kumi n'Ebyiri muri Stade Amahoro.
Jimmy Mulisa yavuze ko umukino wa mbere bawutakaje ariko hari ibyo bakosoye ndetse ko biteguye kubona amanota 3.
Yagize ati " Umukino wa mbere twarawutakaje hari ibyo twakosoye ,ubu abakinnyi bariteguye neza, ikipe turayizi, amakosa twakoze turiteguye neza ngo turebe ukuntu twabona amanota atatu".
Yavuze ko nubwo mu mibare Amavubi bitashoboka ko yabona itike ya CHAN 2024 ariko bo ko bagomba gukora ibyabo.
Yagize ati " Wenda twakaje umukino wa mbere Sudani y'Epfo iratsinda ubona ko amahirwe yacu ntabwo ahari ariko ni ukureba ukuntu turangiza neza dutsinze umukino wacu ntawamenya. Ubu ni ugukora ibyacu iby'andi makipe tukabishyira ku ruhande".
Umutoza w'Amavubi yanasabye Abanyarwanda kuzajya kubashyigikira agira ati"Ikintu nabwira abafana ,ni ikipe yabo ,ni ikipe y'Abanyarwanda ntabwo byagenze neza ku mukino wa mbere ariko urabona ko hari ikintu cyahindutse.
Hari ukuntu abakinnyi bitwaye hariya twagize amahirwe make ariko urabona ko hari icyizere twari gutsinda ibitego byinshi ntitwabitsinda. Kuri njye nk'umutoza tuba dukeneye abafana, turabasaba nyine baze badushyigikire turebe ukuntu twakitwara neza. Iyo ubonye abafana baje ari benshi hari ikintu bivuze ku bakinnyi".
Yavuze ko kandi baganira na Torsten Frank Spittler usanzwe ari umutoza mukuru w'Amavubi ariko kuri akaba ari mu biruhuko aho abagira inama y'ibyo bakora kugira ngo batsinde dore ko n'umukino ubanza yawukurikiranye.
Kapiteni w'Amavubi ya CHAN, Muhire Kevin nawe yunze mu ry'umutoza, avuga ko biteguye gukosora amakosa bakoze.
Ati "Amakosa abantu babonye i Juba ntabwo bazongera kuyabona. Twarayakoze ndetse ni nayo yadukozeho ariko mu minsi tumaze mu myitozo twarayakosoye. Amaso yacu ari ku mukino wa Sudani y'Epfo, twiteguye neza kandi turizeza Abanyarwanda ko tuzabaha intsinzi."
Eng
RSS 
TANGA IGITECYEREZO