Benshi bagendera mu kigare! Inkomoko y’umunsi ukurikira Noheli ‘Boxing Day’

Hari abavuga ko babona ‘Boxing Day’ nk’umunsi w’ikiruhuko gusa, ariko batazi ubusobanuro bwawo.

Boxing Day ni umunsi uba tariki ya 26 Ukuboza ukurikira Noheli, ukaba ufite inkomoko mu Bwongereza, bityo ukaba wizihizwa by’umwihariko mu bihugu byinshi bigize Umuryango w’Ibihugu bikoresha Icyongereza (Commonwealth).

Na none kandi ni umunsi uhuza n’Umunsi mukuru wa Gikristo umunsi wa ‘Mutagatifu Sitefano ku bakirisitu Gatolika.

Boxing Day bitangazwa ko yabonye izina mu gihe Umwamikazi w’u Bwongereza Victoria yari ku ngoma. 

Mu kinyejana cya 19, Umwamikazi Victoria w’u Bwongereza, yavuze ko uyu munsi uba ikiruhuko ku bagize umuryango mu bihugu bikoresha ururimi rw’Icyongereza, ariko agena ko abashoferi n’abatanga amafunguro bakanayategura muri hoteli cyangwa resitora, n’abandi abakozi baba bakoze kuri Noheli, bajya bahabwa ishimwe mu mpano yoroheje, kubera ko baba bakoze aho kujya kuwizihiza nk’abandi.

Uyu mugenzo wahujwe n’umuco gakondo w’Abongereza aho abakozi bakoreraga abakire babaga bemerewe gusura imiryango yabo bucyeye bwa Noheli, kuko ku munsi wa Noheli babaga bahugiye mu kazi bari gukorera ba shebuja.

Abakoresha babo bahaga buri mukozi agasanduku ko kajyana mu rugo karimo impano, ibihembo, ndetse rimwe na rimwe n’ibiryo byasigaye.

Kugeza mu mpera z’ikinyejana cya 20, hakomeje kubaho uwo muco muri benshi mu Bwongereza. 

Ibihugu byinshi byo mu muryango w’ibihugu bikoresha Icyongereza, Leta Zunze Ubumwe z’America, Canada n’ahandi, by’umwihariko, byizihiza uyu munsi.

Amabara yagenewe uyu munsi, arimo umweru, icyatsi kibisi n’ubururu bwerurutse.

Kuri uyu munsi, usanga abahawe impano zitandukanye za Noheli bazifungura kuko mu bihugu byateye imbere aba ari nyinshi, ku nsengero no ku kiliziya nabo bafungura izagenewe umwana Yezu uba wavutse, bakazifashisha abakene.