Ikipe ya Rayon Sports ikeneye amafaranga agera kuri Miliyoni 114 z'Amafaranga y'u Rwanda kugira ngo ihembe abakinnyi ikirarane ibabereyemo ndetse izanagure abashya.
Ejo ku Cyumweru tariki ya 22 Ukuboza 2024 nibwo ubuyobozi bwa Rayon Sports burangajwe imbere na Twagirayezu Thaddée bwaganiriye n'abahagarariye abafana (Fans Club) baganira ku ngingo zitandukanye.
Muri iyi nama Perezida wa Rayon Sports yavuze ko ku mukino wayo na APR FC bari biteze ko bazinjiza Miliyoni 132 avuye mu kugura amatike gusa bikarangira binjije Miliyoni 152 n'amafaranga y'u Rwanda.
Muri aya mafaranga bahayemo FERWAFA Miliyoni 9 Frw angana na 9%,baha abacuruza amatike Miliyoni 15 Frw angana na 15%,batanga miliyoni 4 Frw z'imisoro ndetse banishyura Stade agera kuri miliyoni 10 Frw bituma hasigara miliyoni 112 Frw.
Usibye aya mafaranga yavuye mu matike ariko Rayon Sports yanabonye amafaranga agera kuri miliyoni 53 z'Amanyarwanda yavuye mu baterankunga aho iyi kipe yahise inakuramo miliyoni zirenga 40 ikazikoresha mu gutegura umukino ndetse no mu bijyanye na protocol.
Muri rusange amafaranga yari asigaye iyi kipe yahise iyakoresha yishyura uwari wayigurije miliyoni 42 zo gukoresha mu guhemba amafaranga y'ibirarane bari barimo abakinnyi.
Twagirayezu Thaddée yavuze ko muri rusange mu mafaranga bakuye ku mukino na APR FC,kuri ubu basigaranye agera kuri miliyoni 53 z'Amanyarwanda kuri konte.
Yavuze ko kandi kuri ubu bakeneye Miliyoni 114 Frw kugira ngo bahembe ikirarane cy'ukwezi kwa 11 bafitiye abakinnyi ndetse bazanagure abakinnyi bashya. Rayon Sports buri kwezi ikoresha Miliyoni 45 Frw mu guhemba abakinnyi ndetse izanakoresha Miliyoni 69 Frw mu kugura abakinnyi.
Perezida wa Rayon Sports yatangaje ibi nyuma y'uko abayobozi b'iyi kipe baheruka kwiyemeza ko bagomba kwishakamo ibihumbi 60 by'Amadorali azakoreshwa mu kugura abakinnyi mu kwezi kwa Mbere k'umwaka utaha.
Perezida wa Rayon Sports yavuze ko bakeneye Miliyoni 114 Frw kugira ngo bakemure ibibazo by'ibanze
Eng
RSS 
TANGA IGITECYEREZO