Ku mugoroba wo kuri uyu wa Gatanu tariki ya 20 Ukuboza, kuri Petit Stade Amahoro i Remera, ikipe ya Police HC yegukanye intsinzi mu mukino wayihuje na APR HC.
Aya makipe yombi ahagarariye u Rwanda, yakinaga umukino wa 1/2 cy'irangiza mu irushanwa rya ECAHF Senior Club Championship, rihuza amakipe yitwaye neza mu bihugu byo mu Karere k'Afurika y'Iburasirazuba no hagati, ririmo kubera mu Rwanda ku nshuro yaryo ya 42.
Ni umukino w'ishiraniro wari utegerejwe na benshi, ikipe ya Police HC yitwayemo neza, urangira itsinze APR HC ibitego 25 kuri 23. Waranzwe n'ishyaka ryinshi nk'ibisanzwe iyo aya makipe yahuye, igice cya mbere kirangira APR HC iri imbere n'ibitego 13 kuri 11 bya Police HC.
Mu gice cya kabiri abakinnyi ba Police HC baje bahinduye imikinire, bagerageza kwishyura ibitego bari batsinzwe, kugeza ku munota wa nyuma w'umukino Police HC yegukanye intsinzi.
Umutoza wa Police HC, CIP (Rtd) Antoine Ntabanganyimana yagarutse ku ibanga yakoresheje ririmo kwiga neza imikinire y'ikipe bahanganye (Adversaire), gushyira hamwe no kwirinda igihunga.
Yagize ati: "Igice cya mbere twagiye tugira amahirwe yo gutsinda ariko tukagenda duhusha ibitego. Mu karuhuko nasabye abakinnyi gutuza kandi bagashyira imbaraga mu kugarira izamu ry'uwo duhanganye ariko bakanacishamo bagasatira izamu rye. Babikoze nk'uko babigiriwemo inama kandi bitanga umusaruro."
Yakomeje kwizeza abakunzi ba Police HC ko izegukana igikombe bakagikura mu nzara ikipe ya NCPB yo muri Kenya bazahura ku mu kino wa nyuma cyane ko ari n'ikipe bahuye kenshi imikinire yayo izwi.
NCPB niyo iheruka kwegukana iki gikombe umwaka ushize itsinze Gicumbi HT, mu irushanwa ryari ryabereye mu gihugu cya Kenya.
Police HC iramutse itsinze uyu mukino wa nyuma yaba ari inshuro ya kane yegukanye igikombe muri iri rushanwa. Umwanya wa Gatatu uzahuza APR HC na SOS HC yo mu gihugu cy'u Burundi.
Police HC yageze ku mukino wa nyuma w'irushanwa rya ECAHF
Eng
RSS 
TANGA IGITECYEREZO