Bwa mbere mu mateka Rutsiro Fc igiye gucakirana n’Amagaju muri shampiyoya y’icyiciro cya mbere

Kuri uyu wa Gatanu tariki 20 Ukuboza 2024, Rutsiro n’Amagaju zidafite abakinnyi batatu bajyanye n’ikipe y’igihugu i Juba mu gushaka itike ya CHAN, zirakomeza imikino ya shampiyona, aho amakipe yombi aza kwesuranira mu karere ka Rubavu.

Ni umukino usobanuye byinshi mu makipe yombi, kuko nibwo araza gukina ku nshuro ya mbere ahuriye muri shampiyona y’u Rwanda icyiciro cya mbere. 

Ubusanzwe aya makipe ntabwo ajya anakunda gukina, kuko mu mateka yayo akinnye inshuro imwe gusa. Tariki ya 19 Mutarama 2020 nibwo amakipe yombi yahuye muri shampiyona y'icyiciro cya kabiri maze Rutsiro FC itsinda Amagaju ibitego 4-1, icyo gihe Rutsiro yatsindiwe na Nshimyumuremyi Olivier yatsinzemo ibitego 2, Habagusenga Gerald atsinda ibitego 2, naho Amagaju atsindirwa na Byiringiro Irene.

Amagaju na Rutsiro arakina ku nshuro ya mbere muri shampiyona y'u Rwanda

Uyu mukino Rutsiro yatsinzemo Amagaju ibitego bine kuri kimwe, wari uwa shampiyona yo mu cyiciro cya Kabiri mu mikino ibanza, ariko imikino yo kwishyura ntabwo bongeye guhura kubera icyorezo cya Covide-19 .

Ikipe ya Rutsiro FC yahinzwe muri 2014, itangira guikina icyiciro cya kabiri, icyo gihe Amagaju nibwo yari mu cyiciro cya mbere.

Mu mwaka w’imikino wa 2018-19, Amagaju yamanutse mu cyiciro cya kabiri akaba ari nabwo yagize amahirwe yo gukina na Rutsiro umukino umwe. Mu 2021-22 Rutsiro Fc yahise izamuka mu cyiciro cya mbere, isiga Amagaju mu cyiciro cya kabiri.

Ubwo Rutsiro yongeye gusubira mu cyiciro cya kabiri mu mwaka w’imikino wa 2022-23, ni nabwo Amagaju yazamutse mu cyiciro cya Mbere. Rutsiro Fc yongeye kugaruka mu cyiciro cya Mbere uyu mwaka, akaba aribwo ihuriye n’Amagaju mu cyiciro cya mbere.