Abantu 184 bishwe muri Haiti

I Geneve Volker Turk yabwiye abanyamakuru  ati: "Mu mpera z'icyumweru gishize, abantu 184 baguye mu irasana ry'agatsiko k'amabandi gakomeye mu murwa mukuru wa Haiti, Port-au-Prince, mu gace ka Cite Soleil." 

Yakomeje avuga ko ubu bwicanyi bwongereye umubare w’abahitanywe n’ubugizi bwa nabi  ku kigero kinini cyane.

News Central ivuga ko byibuze abantu bagera kuri 41,000 bavuye mu byabo muri aka gace kubera ubukana bw’agatsiko k’abagizi ba nabi n’umutekano muke mu murwa mukuru wa Haiti ku va ku ya 11 Ugushyingo.

Save the Children ivuga ko hafi 52% by'abavuye mu byabo, abarenga 21,000 ari abana, abenshi muri bo bakaba barahatiwe kwimuka inshuro nyinshi mu myaka ibiri ishize.

 Ihohoterwa rikomeje kubera muri Haiti ryatumye umubare w'abana binjizwa muri ako gatsiko mu mwaka ushize wiyongera 70%, nk'uko byatangajwe n’Umuryango w’Abibimbye.

Benshi muri aba bana bahatiwe kwinjira muri ako gatsiko, mu gihe bamwe babikoze babikeneye ku giti cyabo.

Ihohoterwa ryabereye mu murwa mukuru ryakajije umurego nyuma yo kwirukanwa no gusimbuzwa kwa Minisitiri w’Intebe w’agateganyo wa Haiti, mu gihe amakimbirane ya politiki ndetse n’ibirego bya ruswa bikorwa n’abagize akanama k’inzibacyuho kashyizweho kugira ngo imiyoborere ishingiye kuri demokarasi igerweho.

Umuryango w’Abibumbye uvuga ko muri iki gihe utu dutsiko tugenzura 85% by'umurwa mukuru.

Umwanditsi: KUBWIMANA Solange