APR FC mu mibare isumbana imbere ya mukeba

Ku mugoroba wo kuri iki Cyumweru tariki 01Ukuboza 2024, ikipe ya APR FC yatsinze AS Kigali, ikuraho agahigo kabi yari imaranye imyaka itanu itayitsinda. Uretse gukuraho ako gahigo kabi, yashimangiye ko nubwo intagiriro zayo zarimo ibizazane byinshi, ikiri ya yindi kandi irwanira igikombe cya shampiyona.

APR FC yagize intangiriro mbi za shampiyona y’u Rwanda, Rwanda Premier League 2023-24, nyuma yo kuzongwa n’amakipe arimo Etincelles FC, Rutsiro Fc na Gorilla Fc ubwo ku mukino wayo yashyize abanyamahanga barindwi mu kibuga, bikarangira itewe mpaga.

Nyuma yo kudahirwa n’iyo mikino, APR FC wasangaga abakinnyi biganjemo abo yaguze bo kuyifasha muri uyu mwaka w’imikino bafite urwego ruri hasi, ikipe ikanengwa kuba itarashishoje neza mu kugura abakinnyi, cyangwa ikaba yarabeshywe cyane ku isoko ry’igura n’igurisha.

APR FC kandi ni ikipe yatangiranye shampiyona ibirarane byinshi, nyuma y’uko imikino ya shampiyona y’u Rwanda ubwo yatangiraga, yo yari ihagarariye u Rwanda mu mikino ya CAF Champions League, imikino ihuza amakipe meza cyane mu bihugu akomokamo.

Uko iminsi iri kwicuma, APR FC nayo yatangiye gutsinda imikino itandukanye yikurikiranya, nyuma yo gutsinda Muhazi Unite, Bugesera na AS Kigali, ubu nayo imaze gukurikiranya imikino itatu isaruramo amanota Icyenda ingunga.

Mu mukino itatu APR FC imaze gutsinda yikurikiranya, imaze gutsindamo ibitego bine. Igitego kimwe yatsinze Muhazi United, ibitego bibiri yatsinze Bugesera FC ndetse n’igitego kimwe yatsinze AS Kigali.

Mu mikino 11 imaze gukinwa muri shampiyona y’u Rwanda, APR FC imaze gukinamo umunani, ifite amanota 17, iri ku mwanya wa Gatanu. Mu gihe APR FC yakomeza umujyo wayo wo gutsinda, imikino 11 yarangira ifite amanota 26, angana n’ayo Rayon Sports ifite kugeza ubu iri ku mwanya wa mbere. Mu gihe APR FC yatsinda ibirarane byayo byose, ubwo haba harimo ko yanatsinze Rayon Sports kuko n’umukino wa Rayon uri mu birarane APR FC ifite.

Kuri uyu wa Gatandatu itariki 7 Ukuzoza 2024, nibwo impaka zicika nyuma y’uko Rayon Sports izacakirana na APR FC kuri Stade Amahoro mu mukino w’ikirarane cy’umunsi wa Gatatu wa shampiyona.

Ikipe ya APR nitsinda Rayon Sports, ibintu bizaba bigiye mu buryo bwayo, kuko niguma kugendera mu mujyo wo gutsinda na Rayon Sports igatsinda imikino yayo, APR FC izajya kurangiza ibirarane byayo inganya amanota na Rayon Sports.

Mu mikino y'ibirarane ikipe ya APR FC isigaje, harimo ikiraranme cya Kiyovu Sports, Ikirarane cya Rayon Sports ndetse n'ikirarane cya Musanze FC. Nubwo gutsinda ibirarane byose byaha APR FC amahirwe yo kunganya na Rayon Sports,  ntabwo twakwirengagiza ko Ikipe ya Musanze FC ikunze kugora iyi kipe y'ingabo z'igihugu, byagera kuri Rayon Sports bikaba ibindi bindi. 

APR FC yagize intangiriro mbi za shampiyona, uko imikino iri kwigira imbere niko iri kugaruka mu bihe byayo

APR FC imaze gutsinda imikino itatu yikurikiranya