Mugisha Bonheur yatanze umwanya wa mbere! Uko Abanyarwanda bakina hanze bitwaye mu Cyumweru gishize

Duhereye muri Kenya, ku Cyumweru, ikipe ya AFC Leopards ikinamo Gitego Arthur yatsinze ikipe ya Kenya Police FC igitego 1-0. Muri uyu mukino ntabwo uyu rutahizamu yigeze abanza mu kibuga ndetse nta nubwo yari ku ntebe y'abasimbura.

Kugeza ubu AFC Leopards iri ku mwanya wa 7 muri shampiyona ikaba izasubira mu kibuga kuwa Gatandatu ikina na Kakamega Homeboyz.

Muri shampiyona y'icyiciro cya mbere muri Afurika y'Epfo, kuwa Gatandatu nibwo ikipe ya Kaizer Chiefs ikinamo Ntwari Fiacre yanganyaga na Royal AM ibitego 2-2. Muri uyu mukino ntabwo uyu munyezamu w'Amavubi yabanje mu kibuga, nta n'ubwo yari ku ntebe y'abasimbura.

Kugeza ubu Kaizer Chiefs iri ku mwanya wa 7, izasubira mu kibuga ku Cyumweru ikina na Polokwane City.

Muri shampiyona y'icyiciro cya mbere muri Tunisia, kuwa Gatandatu ikipe ya Stade Tunisien ikinamo Mugisha Bonheur yatsinze Club Africain igitego 1-0. Uyu mukinnyi w'Umunyarwanda yari yabanje mu kibuga ndetse ni nawe watsinze iki gitego ku munota wa 45.

Iki gitego cyafashije Stade Tunisien guhita ifata umwanya wa mbere muri shampiyona. Izasubira mu kibuga ikina na CS Sfaxien kuwa Gatandatu w'ikindi Cyumweru.

Tukiri muri iyi shampiyona kandi kuwa Gatandatu ikipe ya Olympique de Beja ikinamo Ishimwe Anicet yatsinzwe na Tataouine igitego 1-0.

Uyu mukinnyi w'Umunyarwanda yabanje mu kibuga gusa aza gusimbuzwa. Kugeza ubu Olympique de Beja iri ku mwanya wa 7 muri shampiyona ikaba izasubira mu kibuga taliki ya 14 z'uku kwezi ikina na Soliman.

Muri shampiyona y'icyiciro cya mbere muri Ukraine, kuwa Gatandatu ikipe ya FC Kryvbas Kryvyi Rih ikinamo Bizimana Djihad yatsinze Polissya ibitego 3-2. Kapiteni w'Amavubi ntabwo yabanje mu kibuga ariko yinjiyemo asimbuye ku munota wa 68.

Kugeza ubu Kryvbas Kryvyi Rih iri ku mwanya wa 4 ikaba izasubira mu kibuga ikina na Chornomorets Odesa kuwa Gatandatu. Kuwa Gatandatu, FC Zira yo muri Azerbaijani ikaba inakinamo Mutsinzi Ange, yatsinze ikipe yitwa Sumqayit ibitego 4-1.

Uyu myugariro w'Amavubi yabanje mu kibuga gusa aza gusimbuzwa ku munota wa 57. Kugeza ubu FC Zira iri ku mwanya wa 4 muri shampiyona ikaba izasubira mu kibuga ikina na Shamakhi kuwa Kane.

Muri shampiyona y'icyiciro cya mbere muri Cyprus, ku wa Gatandatu nibwo ikipe ya AEL Limassol ikinamo Imanishimwe Emmanuel Manguende yanganyaga 0-0 na Paralimni.

Uyu myugariro w'Amavubi yabanje mu kibuga ariko aza gusimbuzwa ku munota wa 66. Kugeza ubu AEL Limassol iri ku mwanya wa 8 muri shampiyona ikaba izasubira mu kibuga kuwa Kane ikina na Ayia Napa.

Kuwa Gatatu w'icyumweru gishize ni bwo ikipe ya Brera Strumica ikina muri shampiyona y'icyiciro cya mbere muri Macedonia inakinamo Rwatubyaye Abdul yatsindaga Besa Doberdoll igitego 1-0. Uyu myugariro w'Amavubi yabanje mu kibuga ndetse nta nubwo yigeze asimbuzwa.

Kugeza ubu Brera Strumica iri ku mwanya wa 6 muri shampiyona ikaba izasubira mu kibuga ikina na Robotnicki kuwa Kabiri w'iki cyumweru.

Muri shampiyona y'icyiciro cya kabiri mu Bubiligi, ku Cyumweru nibwo ikipe ya Raal La Louviere ikinamo Samuel Gueulette yatsindaga Eupen ibitego 4-3. Uyu mukinnyi w'Amavubi yabanje mu kibuga ndetse arangiza n'umukino.

Kugeza ubu ikipe ya Raal La Louviere iri ku mwanya wa kabiri ku rutonde rwa shampiyona aho inganya amanota n'ikipe ya mbere, ikaba izasubira mu kibuga ikina na Jong KRC Genk ku Cyumweru.

Mugisha Bonheur yatsindiye ikipe ye biyifasha gufata umwanya wa mbere