Perezida Kagame yakurikiye isiganwa rya Qatar Grand Prix

Ku wa Gatandatu taliki 30 Ugushyingo 2024 nibwo Perezida Kagame yageze muri Qatar aho yagiye mu ruzindiko rw'akazi ndetse akigera ku Kibuga cy’Indege Mpuzamahanga cya Hamad, yakiriwe n’Umunyamabanga Mukuru muri Minisiteri y’Ububanyi n’Amahanga wa Qatar Dr. Ahmed bin Hassan Al Hammadi hamwe n’Ambasaderi w’u Rwanda muri Qatar Igor Marara Kainamura.

Nyuma yo kugera muri iki gihugu yagiranye ibiganiro na Emir wa Qatar none ku munsi w'ejo ku Cyumweru,aba bombi banakurikiye isiganwa rya Formula 1 Qatar Airways Grand Prix y’uyu mwaka wa 2024, yabereye i Doha muri Qatar mu muhanda Lusail International Circuit.

Iri siganwa rya Formula 1 rya 23 muri 24 akinwa mu mwaka nk’uko biri ku ngengabihe y’uyu mukino wo gusiganwa mu tumodoka duto,ryegukanwe na Max Verstappen. Uyu mugabo ni isiganwa rya Kabiri yari yegukanye yikurikiranya ndetse yamaze no kwegukana igikombe bitewe nuko arusha amanota bagenzi be kandi habura isiganwa rimwe.

Muri iri siganwa kandi u Rwanda rwahawe amahirwe yo kwerekana umwihariko w'ubukerarugendo bwarwo ndetse n’aho rugeze rwitegura kwakira Inama y’Inteko Rusange y’Ishyirahamwe ry’Umukino w’Imodoka ku Isi (FIA) mu mwaka wa 2024.

Ntabwo ari ubwa mbere Perezida Kagame akurikiye isiganwa rya Formula 1 dore ko muri Nzeri uyu mwaka yakurikiye Singapore Grand Prix.

Perezida Kagame na Emir wa Qatar banaboneyeho umwanya wo kuganira

Perezida Kagame na Emir wa Qatar bakurikira isiganwa 

Max Verstappen wegukanye isiganwa