Kaminuza y’u Rwanda yaje mu 10 nziza zibarizwa munsi y’Ubutayu bwa Sahara

Ikinyamakuru cyo mu Bwongereza, Times Higher Education, cyakoze urutonde rwa Kaminuza zikomeye zibarizwa munsi y'Ubutayu bwa Sahara muri uyu mwaka, ishyira Kaminuza ya Johannesburg yo muri Afurika y'Epfo ku mwanya wa mbere.

Uru rutonde rukorwa hashingiwe ku myigishirize, ubushakashatsi bukorwa n'umusaruro wabwo, rwagaragayeho na Kaminuza y'u Rwanda imaze imyaka yaje ku mwanya wa gatandatu ndetse na Kaminuza ya UGHE yashyizwe ku mwanya wa kane.

Uretse Kaminuza ebyiri zo mu Rwanda n’izindi enye zo muri Afurika y’Epfo, ibindi bihugu bifite kaminuza ziza mu myanya 10 ya mbere birimo Ghana ifitemo ebyiri, Somalia ndetse na Uganda zifitemo imwe.

Kaminuza y’u Rwanda iciye aka gahigo nyuma y’uko ishyize ku isoko abarenga 8,068 barimo 946 bahawe impamyabumenyi y’icyiciro cya gatatu cya Kaminuza, 53 bahawe impamyabumenyi z’ikirenga n’abandi bo mu cyiciro cya kabiri cya kaminuza 6657.

Ni umuhango wabaye kuri uyu wa 25 Ukwakira 2024, witabiriwe na Minisitiri w’Intebe Dr. Edouard Ngirente. Abakobwa basoje amasomo ni 3,109 mu gihe abagabo ari 4959.

Mu basoje amasomo harimo abarenga 100 baturuka mu bihugu 24 bitandukanye byo ku Isi.

Minisitiri w’Intebe, Dr Ngirente Edouard akomoza kuri aba banyamahanga, yaragize ati: “Bigaragaza ko Kaminuza y’u Rwanda ikomeje kunoza ireme ry’uburezi buyitangirwamo ku buryo n’abanyeshuri baturutse hanze y’u Rwanda bishimira kuyigamo.’’

Ibi bitangajwe mu gihe Minisitiri w’Uburezi, Joseph Nsengimana, yagaragaje ko muri 2035 u Rwanda ruzaba ari igicumbi cy’uburezi muri Afurika ku buryo Abanyafurika bashaka kwiga kaminuza bazajya barutekereza mu mwanya ya mbere.

Yabigarutseho ubwo yaganiraga n’Abadepite bagize Komisiyo y’Uburezi, Ikoranabuhanga, Umuco, Siporo n'Urubyiruko mu Nteko Ishinga Amategeko y’u Rwanda, yemeza ko kuri ubu mu Rwanda hari abanyamahanga biga muri kaminuza barenga ibihumbi 10.

Raporo y’uyu mwaka yakusanyije amakuru yo muri kaminuza 129 zo mu bihugu 22 byo munsi y’Ubutayu bwa Sahara, hashingirwa ku gupima uruhare izo kaminuza zigira mu guteza imbere ibihugu ziherereyemo.

Kaminuza y'u Rwanda yashyizwe mu 10 nziza muri Afurika yo munsi y'Ubutayu bwa Sahara