Abanyeshuri bahize abandi bashimiwe hanasobanurwa impamvu y'icyuho cyagaragaye mu mitsindire

Mucyo Samuel wigaga kuri ESTB Busogo ni we wabimburiye abandi mu guhembwa, igihe abayobozi batandukanye bahembaga abana 18 bahize abandi mu rwego rw'Igihugu mu bizamini bya Leta bisoza amashuri yisumbuye umwaka 2023/2024.

Abanyeshuri 18 bahize abandi ku rwego rw'Igihugu baturuka mu bigo by'amahuri bitandukanye. Bose bakaba bahawe ibihembo bigizwe na 'Laptop' na 'Certificate' yo kubashimira umurava bagize no kubasaba gukomeza kwiga neza mu cyiciro gikurikiyeho.

Minisitiri w’Uburezi, Joseph Nsengimana yavuze imibare y’abatsinze muri uyu mwaka iri hasi cyane ugereranyije n’umwaka ushize. Avuga ko kuba abatsinze ari bake, biri mu mujyo wo gukaza ireme ry’uburezi, kugira ngo u Rwanda ruzabashe kugera ku ntego rwihaye mu cyerekezo 2050.

Yagize ati: “Murabizi ko u Rwanda hari ibyo rwiyemeje kugeraho mu cyerekezo 2050, bisaba ko tuzazamuka mu ntera y’ubumenyi ko ubukungu bw’u Rwanda buzaba bushingiye ku bumenyi, icyo bisaba rero ni ukugira ngo ubwo bumenyi tubukaze, tubushyiremo imbaraga.”

Minisitiri Nsengimana yavuze ko nk’inzego zireberera uburezi ndetse na Guverinoma muri rusange, intego ari uko abana bahabwa ubumenyi buzabafasha gushyira mu bikorwa ibyo u Rwanda rwiyemeje kugeraho.

Ati: “Ari mu kwigisha ari no mu kubaza no mu gutsinda tujya imbere, turasaba abantu ko babishyiramo imbaraga kuko uburezi ni bwo tuzashingiraho kugira ngo tugere ku cyerekezo 2050, kuko ntabwo dushobora kuyigeraho ubumenyi butazamutse, turasaba ubufatanye kugira ngo abana bacu bazabashe kuzamuka bafite ubwo bumenyi navugaga.”

Minisiteri y’Uburezi yatangaje uburyo bushya bwo kugena amanota ashingirwaho kugira ngo abanyeshuri bakomeza muri kaminuza, aho uzajya yemererwa ari uwagize 50% mu masomo yose.

Ni uburyo butandukanye n’ubwari busanzweho, aho uwemererwaga kujya muri kaminuza ari uwabaga yatsinze amasomo abiri y’ingenzi.

MINEDUC ivuga ko abagize munsi ya 50% bazajya bafashwa mu kuba basibira cyangwa bagakora ibizamini byo gusubiramo mu buryo buzwi nka ‘Candidat Libre’.

Umunyamabanga wa Leta muri Minisiteri y’Uburezi, Irere Claudette yavuze ko abanyeshuri batsinzwe, barimo abazakenera gusibira bazafashwa haba ku bigo bigagaho cyangwa ibindi bashobora kujyaho.

Ku bazakenera gukora ‘Candidat Libre’, yavuze ko hakozwe ubugenzuzi ku bigo bitanga iyo serivisi ndetse hari urutonde rw’ibyemejwe bitewe n’ubushobozi basanze bifite.

Ati: “Hariho abazifuza gusubira mu mashuri, rwose ntawe uzababuza gusubirayo ariko utashaka gusubirayo twanakoze isuzuma kuri ibi bigo bikoresha ‘Candidat Libre’, hari ibyo tumaze gusuzuma tuzi neza ko bizabafasha.”

Imibare ya Minisiteri y’Uburezi igaragaza ko abakoze ibizamini bya Leta bose ari 91.298, mu gihe abari biyandikishije ari 91.713. Muri rusange abakoze ni 99,5%.

Abatsinze ibizamini ni 71.746. Ni ukuvuga ko batsinze ku gipimo cya 78.6%. Abahungu batsinze ni 50,5% mu gihe abakobwa ari 49, 5%.

Ni igikorwa cyitabiriwe na Minisitiri w’Uburezi, Joseph Nsengimana, abayobozi b’ibigo bishamikiye kuri iyi minisiteri, abayobozi mu zindi nzego zifite aho zihuriye n’uburezi, abana bahize abandi ku rwego rw’Igihugu n’ababyeyi babo n’abandi.

Abanyeshuri bahize abandi mu bizamini bya Leta bisoza amashuri yisumbuye bashimiwe mu buryo bwihariye

Byari ibyishimo bidasanzwe ku banyeshuri bahize abandi n'ababyeyi babo

Ababyeyi bari babukereye