U Rwanda rwatsinzwe umukino wa Kabiri mu gushaka itike y'igikombe cy'Afurika cya Basketball

Ni mu mukino wo mu itsinda C wakinwe kuri uyu wa Gatandatu tariki ya 23 Ugushingo 2024 Saa Tanu z'ijoro, ukinirwa muri Dakar Arena mu gihugu cya Senegal.

Uyu mukino watangiye ikipe y'igihugu ya Cameroon iri hejuru binyuze ku bakinnyi bayo Fabien Quentin Philibert Ateba wakoraga amanota 3. 

Abakinnyi b'u Rwanda barimo Antino Alverazes Jackson nabo bagerageje kwitwara neza birufasha kudasigara cyane maze agace ka mbere karangiye Cameroon iyoboye n'amanota 25-20.

Mu gace ka Kabiri ibintu byabaye bibi ku ikipe y'igihugu y'u Rwanda aho yari yarushijwe mu buryo bugaragara dore ko yabashije gutsinda amanota 8 gusa ya Steven Hagumintwari na William Robeyns.

Ikipe y'igihugu ya Cameroon ibifashijwemo n'abarimo Fabien Quentin Philibert Ateba yo yatsinze amanota 22, bajya kuruhuka ikomeje kuyobora n'amanota 47-28 muri rusange.

Mu gace ka Gatatu u Rwanda rwaje rwiminjiyemo agafu aho rubifashijwemo n'abarimo William Robeyns arirwo rwatsinze amanota menshi agera kuri 15-11 ariko n'ubundi Cameroon igakomeza kuyobora n'amanota 58-43.

Mu gace ka Kane nabwo ikipe y'igihugu y'u Rwanda yaje ikomeza kwitwara neza ariko yasaga n'iyibutse itinze dore ko nta cyo byayimariye.

Muri aka gace kanyuma Antino Alverazes Jackson yigaragaje cyane atsinda  amanota maze u Rwanda rutsindamo 16-12 ariko birangira ikipe y'igihugu ya Cameroon yegukanye intsinzi ku manota 70-59.

Uwatsinze amanota menshi muri uyu mukino ni William Robeyns agera kuri 19.

Uyu ni umukino wa Kabiri u Rwanda rutsinzwe nyuma y'uko ku wa Gatanu rwatsinzwe na Senegal.