Pep Guardiola yemeye icyaha ashimangira ko Man City iri mu bihe bibi

Ikipe ya Manchester City, yamamaye kubera gutsinda imikino myinshi mu bihe byatambutse, iri mu bihe bitamenyerewe. 

Nyuma yo gutsindwa ibitego 4-0 na Tottenham kuri Etihad Stadium, umutoza Pep Guardiola yatangaje amagambo atangaje, yemera ko ikipe ye iri mu kibazo gikomeye kandi ko bakwiye kwemera ukuri bagakosora ibitagenda neza.

Gutsindwa na Tottenham byatumye ikipe ya Manchester City itsindwa imikino 5 yikurikiranya mu marushanwa yose, ibintu bidakunze kuyibaho. 

Gutsindwa na Tottenham ibitego 4-0 byabaye ikimenyetso gikomeye cy’uko ibintu bimeze nabi, nk'uko byatangajwe na Pep Guardiola wagize ati: "Tugomba kwemera ukuri kandi tukaguhindura."

Ni ubwa mbere muri Premier League kuva Pep Guardiola yagera muri iyi shampiyona mu 2016, iyi kipe itsinzwe iyi mikino yikurikiranya.

Ni ibintu bidasanzwe kandi byongeye kwibutsa abakunzi ba ruhago ko n’ibihangange bishobora kugorwa n’ibihe.

Pep Guardiola yatanze impamvu nyinshi zituma ikipe iri mu bihe bikomeye, harimo imvune z’abakinnyi. Kubura Rodri uzwiho kuba ari umwe mu bakinnyi b’imena ku rwego mpuzamahanga, byagize ingaruka zikomeye ku ikipe.

Guardiola yavuze ko Rodri ari umukinnyi udasimburwa kandi kubura kwe byagize uruhare mu musaruro mubi w’ikipe.

Pep Guardiola yanatanze impamvu avuga ko amakosa mato yateye ingaruka zikomeye, ati: "Hari ibintu bitagaragara cyane mu mukino ariko bigira uruhare rukomeye mu bibazo dufite."

Imibare irerekana ko Man City iri kugenda isubira inyuma ugereranyije n’umwaka ushize. 

Manchester City yatsinze ibitego 2.3 ku giteranyo cya buri mukino umwaka ushize, ariko ubu iri gutsinda 0.8 muri uyu mwaka.

Nubwo ibintu bimeze nabi, Guardiola aracyafite icyizere mu bakinnyi be, avuga ko ibyo bamugejejeho mu myaka 8 bishimangira ko bafite ubushobozi bwo kuzanzahura ikipe.

Ati: "Mu buzima no mu mupira w’amaguru, hari igihe ibintu bihinduka. Icyo tugomba gukora ni ugufata ibyemezo bikomeye no gusubira ku murongo."

Ikipe ya Liverpool, ishobora gukomeza kongera intera hagati yayo na City kugera ku manota 8 niba itsinze Southampton kuri iki Cyumweru tariki 24 Ugushyingo 2024.

Ibi byongera igitutu kuri Guardiola n’abasore be, cyane ko umukino ukurikira uzabahuza na Liverpool kuri Anfield, ahantu benshi batekereza ko City naho izarya urunganda.

Pep Gualdiola yemeye ko ikipe atoza iri mu bihe bibi

Ikipe ya Man City yaraye itsinzwe na Tottenham ibitego 4 ku busa