Basketball: Inkuru mbi mu ikipe y'u Rwanda mbere yo gushaka itike y'igikombe cy'Afurika

Guhera kuri uyu wa Gatanu, tariki 22 Ugushyingo, u Rwanda ruratangira urugendo rwo gushaka itike y'imikino y'igikombe cy'Afurika cy'abakuru mu bagabo "FIBA AfroBasket", kizabera muri Angola mu 2025.

Mbere yuko uru rugendo rutangira ariko mu ikipe y'Igihugu hamenyekane inkuru mbi aho abakinnyi babiri bari kuzifashishwa, Bruno Shema usanzwe ukinira APR BBC na Alexandre Aerts usanzwe ukinira Ciney Royal Basketball bakuwe mu bandi nyuma yuko bagize ikibazo cy'ibyangombwa bitewe nuko bakiniye ikipe y'igihugu y'u Bubiligi y'Abatarengeje imyaka 18.

Aba bombi bavukiye mu gihugu cy'u Bubiligi gusa bakaba bafite n'Ubwenegihugu bw'Ubunyarwanda. Ibi bibaye nyuma yuko Dylan Schommer yongewe mu ikipe y'Igihugu uyu munsi.

Uyu mukinnyi ntabwo ari ubwa mbere agiye gukinira ikipe y'u Rwanda, aho yayikiniye mu mikino yo gushaka itike y'igikombe cy'Isi mu 2017 (FIBA Basketball World Cup 2019 African Qualifiers).

Ikipe y'igihugu y'u Rwanda izatangira ikina na Senegal ku munsi wejo Saa kumi nebyiri yakoze imyitozo ya nyuma mu mugoroba wo kuri uyu Wa Kane.

U Rwanda rumaze kwitabira imikino ya nyuma y'igikombe cy'Afurika inshuro 6 muri 7, ziheruka. Ikipe y'igihugu yitabiriye Afrobasket bwa mbere mu 2007 (Angola), rwongera kuyitabira mu 2009 (Libya), 2011 (Madagascar), 2013 (Cote d'Ivoire), rubura itike mu 2015, rwongera kwitabira mu 2017 (Tunisie & Senegal) ndetse na 2021 (Rwanda).

Abakinnyi ndakuka ikipe y'igihugu izakoresha batarimo Bruno Shema na Alexandre Aerts