Umunsi Mpuzamahanga w’Abana usanze bagikorerwa ihohoterwa mu miryango

Ibi Ingabire Assumpta yabitangaje kuri uyu wa 20 Ugushyingo 2024, ubwo u Rwanda rwifatanya n’Isi mu kwizihiza Umunsi Mpuzamahanga w'Umwana.

Ikigo cy’Igihugu gishinzwe imikurire no kurengera umwana (NCDA) kibukije ababyeyi ko kurera ari inshingano ndasimburwa, kandi ko kubungabunga umwana kuva agisamwa ari byo bimuremamo umuntu wuzuye.

Mu kwizihiza uyu munsi mu birori byabereye muri Kigali Convention Center, Umuyobozi Mukuru wa NCDA, Ingabire Assumpta, yagize ati: "Haracyari ikibazo mu muryango, ubundi kurera umwana ni inshingano ntasimburwa, rero icyo tuba dushaka kuvuga kuri uyu munsi, tujye tumenya ko umwana kugira ngo azagire ya mikurire myiza, hari uburyo twakora akazakura neza adahungabanye akazaba umuturage mwiza w’igihugu cyacu."

Imibare y’Ikigo cy’Igihugu cy’Ibarurishamibare mu Rwanda (NISR) yo mu 2022 igaragaza ko abarenga miliyoni 5,8 ari abana. Abo bangana na 44.5% by’Abanyarwanda bose.

Muri abo abarenga miliyoni 2,4 bari munsi y’imyaka itandatu. Abo bangana 41% by’abana bose bakagira 18% by’Abanyarwanda bose.

Abantu 4899 batarageza ku myaka 18 y’amavuko, bo hirya no hino mu gihugu bashatse bataruzuza imyaka 18 y’amavuko nk’uko Ibarura Rusange ryakozwe mu 2022 ryabigaragaje.

Itegeko Nshinga ry’u Rwanda ryo mu 2003 ryavuguruwe mu 2015 ritanga umurongo wo gushyira imbaraga mu bikorwa byo kurengera uburenganzira bw’abana.

Hari n’andi mategeko atandukanye yatowe hagamijwe kurwanya ihohoterwa rikorerwa abana, kubuza ko abana bakoreshwa imirimo ihemberwa batarageza ku myaka 16, gukemura ibibazo by’abana b’impfubyi n’ab’abakene no guteza imbere imikurire y’abana bato.

Amasezerano yashyizweho n’Umuryango w’Abibumbye mu 1989 avuga ko umwana ari umuntu wese utarageza ku myaka 18 y’amavuko naho ingimbi n’abangavu ni abari hagati y’imyaka 10 na 19.

Ikibazo cyo guhohotera abana kimaze gufata indi ntera, kuko mu mwaka wa 2019/2020, abasenateri bagaragaje abana basambanyijwe 4.265 muri bo harimo 97.4% ari abakobwa n’abahungu 2.6%.

Uretse gusambanya abana, haracyagaragara n'ibibazo by’ihohoterwa ry’abana rishingiye ku gukoreshwa imirimo ibujijwe cyane cyane mu rwego rw’ubucukuzi y’amabuye y’agaciro, aho usanga hari abana bagisabwa kujyana n’ababyeyi babo muri iyo mirimo, kugira ngo umuryango usarure agatubutse.

Umunsi Mpuzamahanga w'Abana wemerejwe mu Nama Mpuzamahanga yiga ku mibereho myiza y'abana yabereye i Geneve 1925. Kugeza uyu munsi, hari ibihugu bimwe na bimwe bitawizihiza nk'umunsi ahubwo bimara icyumweru cyose mu bikorwa bigamije kurengera uburenganzira bw'abana.

Umuyobozi Mukuru wa NCDA, Ingabire Assumpta yagaragaje bimwe mu bibazo bikibangamiye abana birimo n'ihohoterwa

44.5% by'Abanyarwanda bose ni abana