Umukinnyi ukuze muri ruhago agiye gukina umwaka we w'imikino wa 40 ku myaka 58

Biratangaje kumva umuntu ufite imyaka 58 ugikina umupira w'amaguru nk'uwabize umwuga, ariko Kazuyoshi Miura we yiteguye kubikora.

Ku wa Mbere tariki 11 Ugushyingo 2024, nibwo uyu mukinnyi w'umupira w'amaguru ufatwa nk'ukuze kurusha abandi mu babigize umwuga ku Isi yabitangaje, aganira n'ikinyamakuru cy'iwabo mu Buyapani, yatangaje ko yiteguye gukina umwaka utaha w'imikino dore ko yasinye amasezerano y'umwaka n'igice mu ikipe ye ya Suzuka.

Yagize ati " "Mfite amasezerano y'umwaka umwe n'igice yashyizweho umukono mu mpeshyi y'uyu mwaka . Ntekereza ko ari iterambere risanzwe".

Bivuze ko Kazuyoshi Miura azakina umwaka utaha w'imikino afite imyaka 58 dore ko azayuzuza mu kwezi kwa 2 kwa 2025 ,ukazaba ari umwaka w'imikino wa 40 akinnye.

Uyu mukinnyi yatangiye umwuga wo gukina umupira w'amaguru nk'uwabigize umwuga mu 1986, atangirira muri Santos yo muri Brazil.

Mu 2017 Miura yabaye umukinnyi ukuze kurusha abandi uciye agahigo ko gutsinda igitego muri shampiyona y'u Buyapani, mu mukino Yokohama yakinaga naThespakusatsu Gunma, ubwo yari afite imyaka 50 n'iminsi 14.

Miura uzwi nka 'King Kazu' ni umwe mu bakinnyi bakunzwe cyane mu gihugu cy'u Buyapani, ndetse akaba yarakoreshejwe mu ishusho ya shampiyona ubwo yamurikwaga ku mugaragaro mu 1993.

Uyu mukinnyi ukomeje gutangaza benshi, yatsinze ibitego 55 mu mikino 89 yakiniye ikipe y'igihugu y'u Buyapani, akaba yaranyuze muri shampiyona zikomeye ku Isi harimo iy'u Butaliyani mu ikipe ya Genoa, mbere yo kwerekeza muri Croatia na Australia.

Kazuyoshi Miura yatangaje ko yiteguye gukina umwaka utaha w'imikino