Ibikubiye mu biganiro Kevin Kade yagiranye n’abarimo Weasel muri Uganda- AMAFOTO

Ni igitaramo yakoze mu ijoro ryo ku wa 6 Ugushyingo 2024 rishyira ku wa 7 Ugushyingo 2024, aho cyabereye ahazwi nka ‘Paradigm’. 

Ni ubwa mbere yari ataramiye abanya-Uganda ku butumire bwabo hagamije kwagura urugendo rw’umuziki we. Yitaye cyane ku kuririmba indirimbo ze zakunzwe, bituma abanya-Uganda bamwiyumvamo yongezwa ikindi gitaramo kiba kuri uyu wa Gatanu tariki 8 Ugushyingo 2024 ahazwi nka Noni Vie.

Muri iki gitaramo cye cya mbere yaririmbye n’indirimbo za Goodlyfe zatumye abanya-Uganda bamwiyumvamo. Ni igitaramo cyari gihenze ku buryo kwinjira ku bantu batandatu bicaye ku meza amwe, byasabaga kwishyura amadorali 300.

Iki gitaramo kandi kitabiriwe n’umubare munini w’inkumi z’abanyarwanda babarizwa muri kiriya gihugu. Kuri Kevin Kade ni umugisha ukomeye.

Yabwiye InyaRwanda ati “Hari abasitari benshi barimo nka Weasel, Alex Muhangi, Yoga Pon Dat, Dj Spin ndetse n’abandi bahanzi benshi bo muri Uganda.”

Kevin Kade avuga ko amakuru yabonye ari uko mu gitaramo cye kitabiriwe n’abahanzi barenga 15 bakomeye muri kiriya gihugu. Kandi anavuga ko yagiranye ibiganiro n’urugaga rw’abahanzi muri Uganda bahagarariwe na Eddy Kenzo.

Ati “Ni ibiganiro byabayeho mbifashijwemo na Brune K, uri mu bahanzi bazwi hano. Muri macye, usanga abantu bo muri Uganda basigaye baha agaciro umuhanzi wo mu Rwanda, kuko usanga bakwitayeho mu buryo bwose, yaba ari aho urara, gufasha no mu bindi ukeneye.”

Kevin Kade avuga ko guhura na Weasel ahanini byaturutse mu kuba mu gitaramo cye yaririmbye indirimbo ‘Bread and Butter’ y’itsinda Radio na Weasel.

Ati “Naririmbye indirimbo yabo, hanyuma rero Weasel biramunyura. Mu biganiro twagiranye yambwiye ko yishimira kuba yarashatse umunyarwandakazi wamuhaye abana beza (Teta Sandra), ari nayo mpamvu yahisemo kuza kunshyigikira mu gitaramo. Ikindi twaganiriye mu kuba twakorana indirimbo mu gihe runaka.”

Uyu muhanzi ataramiye muri Uganda, mu gihe ari no kwitegura gukorera igitaramo cye cya mbere mu Mujyi wa Dubai muri Leta Zunze Ubumwe z’Abarabu, kizaba ku wa 9 Ugushyingo 2024. Ni igitaramo cyateguwe na Sosiyete y’umuziki ya Agakoni, ndetse kizabera mu kabyiniro ka Matrix Africa Club.

Azataramira mu Mujyi wa Dubaia abisikana n’abaraperi barimo Riderman, Bull Dogg, Young Grace, P-Fla n’abandi banyuranye bamaze kuhataramira bigizwemo uruhare n’iyi sosiyete yashinzwe na Batman.

Kevin Kade yahuye kandi agirana ibiganiro na Weasel nyuma y’igitaramo cya mbere yakoreye muri Uganda

Kevin Kade ari mu biganiro n’umunyarwenya Alex Muhangi wamamaye mu bitaramo bya ‘Comedy Store’- Uyu mugabo aheruka i Kigali mu bitaramo bya Gen-Z Comedy

KANDA HANO UBASHE KUREBA AMASHUSHO Y’INDIRIMBO ‘SIKOSA’ YA KEVIN KADE, THE BEN NAELEMENT

">