Korali Hoziana yateguye igitaramo cy'iminsi itatu yise "Hoziana Gospel Celebration - Tugumane 2024"

Korali Hoziana izaba iri kumwe n’abandi bakozi b’Imana batandukanye muri iki giterane cyiswe Hoziana Gospel Celebration - Tugumane 2024. Iki gitaramo cyari gitegerejwe cyane, kizaba kuva ku wa Gatanu tariki 22 Ugushyingo, kugeza ku Cyumweru tariki 24 Ugushyingo 2024, kuri ADEPR Nyarugenge mu Gakinjiro.

Iyi minsi itatu y’igitaramo izahuriza hamwe amakorali, abahanzi n’abakozi b’Imana harimo Korali Hoziana, Korali Shalom, Ntora Worship Team, n’abahanzi nka Papy Clever n’umugore we Dorcas, aho ibihe byiza byo kuramya Imana no kwamamaza ubutumwa bwiza bwa Kristo bizazanira abantu kumenya Kristo ndetse byongerere abandi imbaraga n’ibyiringiro.

Nk'uko Ubuyobozi bwa Hoziana Choir bwabitangarije inyaRwanda, insanganyamatsiko y’igitaramo cy’uyu mwaka ishingiye mu Ibyakozwe n’Intumwa 3:19, hagira hati: “Nuko mwihane muhindukire, ibyaha byanyu bihanagurwe ngo iminsi yo guhemburwa ibone uko iza...”

Dore uko gahunda y’igitaramo iteye:

• Ku wa Gatanu, tariki 22 Ugushyingo - Saa kumi z’umugoroba

• Ku wa Gatandatu, tariki 23 Ugushyingo - Saa munani z’amanywa

• Ku Cyumweru, tariki 24 Ugushyingo - Saa munani z’amanywa

Buri wese yahawe ikazee muri iki giterane kizabera kuri ADEPR Nyarugenge mu minsi itatu yo kuramya no guhimbaza Imana ndetse no kwishimira ubutumwa bwiza bwa Kristo. Kwinjira mu gitaramo cya Hoziana Gospel Celebration - Tugumane 2024 ni Ubuntu..

Korali Hoziana yashinzwe mu mwaka wa 1968. Imaze imyaka irenga mirongo itanu ikwirakwiza ubutumwa bwiza binyuze mu ndirimbo, aho yaririmbye mu Rwanda no mu karere.

Hoziana izwi cyane ku ndirimbo zo hambere zirimo Gitare, Yerusalemu, na Mugeni wa Yesu, ndetse ubu iracyakunzwe cyane mu ndirimbo nshya zirimo Dufite Ibihamya, inaherutse kurenza umubare w’abantu miliyoni imwe bayirebye kuri YouTube.

Korali Hoziana imaze imyaka irenga 50 yamamaza ubutumwa bwiza bwa Yesu Kristo

Hoziana Choir yateguy igiterane "Hoziana Gospel Celebration - Tugumane 2024"