Jojea Kwizera yitwaye neza! Uko Abanyarwanda bakina hanze bitwaye mu Cyumweru gishize

Duhereye muri Kenya ku Cyumweru, ikipe ya AFC Leopards ikinamo Gitego Arthur yatsindwaga na Ulinzi Stars ibitego 2-0. Kuri uyu mukino, uyu rutahizamu w'umunyarwanda yari yabanje mu kibuga gusa akaba yaraje gusimbuzwa umukino utarangiye.

Kugeza ubu ikipe ya AFC Leopards iri ku mwanya wa 5  n'amanota 10, ikaba izasubira mu kibuga ku Cyumweru tariki ya 10 Ugushingo ikina na Mara Sugar.

Muri shampiyona y'icyiciro cya mbere muri Tunisia, ku wa Gatandatu ikipe ya Stade de Tunisien ikinamo Mugisha Bonheur yanganyaga na Ben Guerdane 0-0. Kuri uyu mukino nk'ibisanzwe uyu mukinnyi w'ikipe y'igihugu y'u Rwanda, Amavubi, yari yabanje mu kibuga akaba yararangije n'umukino adasimbujwe.

Kugeza ubu ikipe ya Stade de Tunisien iri ku mwanya wa 5 muri shampiyona, ikaba izasubira mu kibuga ku wa Gatandatu ikina na JS Omrane.

Muri shampiyona y'icyiciro cya mbere muri Afurika y'Epfo, ku wa Gatandatu ikipe ya Kaizer Chiefs ikinamo Ntwari Fiacre yanyagirwaga na Mamelodi Sundowns mu mukino wa 1/4 cya Telkom Knockout ndetse ihita inasezererwa.

Kuri uyu mukino uyu munyezamu w'Amavubi niwe wari wabanje mu kibuga nk'uko bimaze kumenyerwa akaba ari nabyo byatumye abafana ba Kaizer Chiefs bamwibasira ku mbuga nkoranyambaga ndetse hakaba hari n'umufana washatse kumukubita ubwo umukino wari ukirangira gusa abashinzwe umutekano bagatabara.

Kugeza ubu ikipe ya Kaizer Chiefs yo iri ku mwanya wa 8 n'amanota 7 muri shampiyona, ikaba izasubira mu kibuga ikina na Richards Bay tariki ya 27 z'uku kwezi.

Muri Ukraine,ku wa Gatatu w'icyumweru gishize ikipe ya FC Kryvbas Kryvyi Rih ikinamo Bizimana Djihad yatsindwaga na FC Polissya Zhytomyr ibitego 4-1 mu mikino ya 1/4 cya cy'igikombe cy'igikombe cy'igihugu.

Kuri uyu mukino, uyu Kapiteni w'Amavubi yari yabanje mu kibuga gusa aza gusimbuzwa ku munota wa 78. Iyi kipe ya FC Kryvbas Kryvyi iri ku mwanya wa 6 kugeza ubu muri shampiyona, irasubira mu kibuga kuri uyu wa Mbere ikina na Rukh Lviv.

Muri shampiyona y'icyiciro cya Kabiri muri Sweden,ku wa Gatandatu ikipe ya Sandvikens IF ikinamo Byiringiro Lague na Mukunzi Yannick wavunitse yatsindwaga na GIF Sundsvall ibitego 2-1.

Kuri uyu mukino Byiringiro Lague yinjiye mu kibuga asimbuye ku munota wa 73. Kugeza ubu ikipe ya Sandvikens IF iri ku mwanya wa Gatanu, ikaba izasubira mu kibuga ikina na Varberg ku wa Gatandatu w'iki Cyumweru.

Tukiri muri iyi shampiyona mu ikipe ya Gefle IF ikinamo Rafael York,ku wa Gatandatu yatsindaga Utsiktens ibitego 2-0. 

Kuri uyu mukino,uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu ikipe ya Gefle IF iri ku mwanya wa 13, ikaba izasubira mu kibuga ikina GIF Sundsvall ku wa Gatandatu.

Muri shampiyona y'icyiciro cya mbere muri Macedonia,ku munsi w'ejo ku Cyumweru ikipe ya Brera Strumica ikinamo Rwatubyaye Abdul yatsindwaga na Sileks igitego 1-0.

Kuri uyu mukino,uyu myugariro w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu ikipe ya Brera Strumica iri ku mwanya wa 8 muri shampiyona, izasubira mu kibuga ikina na KF Shkëndija ku wa Gatandatu w'iki Cyumweru.

Muri shampiyona y'icyiciro cya mbere muri Azerbaijani,ku wa Gatandatu ikipe ya FC Zira ikinamo Mutsinzi Ange yatsindaga Shamakhi ibitego 2-0. 

Kuri uyu mukino uyu myugariro w'Amavubi yari yabanje mu kibuga gusa aza gusimbuzwa ku munota wa 78. Kugeza ubu ikipe ya FC Zira iri ku mwanya wa 4, ikaba izasubira mu kibuga ikina na Araz ku wa Gatatu w'iki Cyumweru.

Ku wa Gatatu w'icyumweru gishize muri Cyprus, ikipe ya AEL Limassol ikinamo Imanishimwe Emmanuel Manguende yatsindaga ikipe yitwa PO Achyronas / Onisilos ibitego 2-0 mu mikino y'igikombe cy'igihugu.

Kuri uyu mukino ntabwo uyu myugariro w'Amavubi yakinishijwe gusa yari ku ntebe y'abasimbura. Iyi kipe ya AEL Limassol iri ku mwanya wa 7 muri shampiyona, irasubira mu kibuga kuri uyu ma Mbere Saa moya z'umugoroba ikina na Anorthosis .

Muri shampiyona y'icyiciro cya Kabiri mu gihugu cy'u Bubiligi ,ku wa Gatandatu ikipe ya La Louviere ikinamo Samuel Gueulette yatsindaga Club Liege ibitego 3-1.

Kuri uyu mukino ,uyu mukinnyi w'Amavubi yari yabanje mu kibuga gusa akaba yarasimbujwe ku munota wa 74. Kugeza ubu muri shampiyona ikipe ya La Louviere iri ku mwanya wa 2, ikaba izasubira mu kibuga ikina na Zulte Waregem ku Cy'umukinnyi.

Mu mikino ya kamarampaka ya shampiyona y'icyiciro cya Kabiri muri Leta zunze Ubumwe za Amerika, ku munsi w'ejo ku Cyumweru ikipe ya Rhode Island ikinamo Kwizera Jojea yatsindaga Indy Eleven ibitego 3-2.

Kuri uyu mukino uyu mukinnyi w'Amavubi yari yabanje mu kibuga ndetse ninawe watanze umupira wavuyemo igitego cya 2 gusa aza gusimbuzwa ku munota wa 83.

Kugeza ubu ikipe ya Rhode Island iri ku mwanya wa Kane.Muri iyi shampiyona kandi ku wa Gatandatu ikipe ya One Knoxville SC ikinamo Nshuti Innocent yatsindwaga na Greenville Triumph SC ibitego 2-1.

Muri uyu mukino uyu rutahizamu w'Amavubi yinjiye mu kibuga asimbuye ku munota wa 82.

Mutsinzi Ange yafashaga ikipe ye kubona intsinzi mu mpera z'icyumweru 

Jojea Kwizera watanze umupira uvamo ifite ku mukino ikipe ye ya Rhode Island yatsindaga ejo ku Cyumweru