Moto zikoresha lisansi zigiye kuba amateka mu Mujyi wa Kigali

Muri Gicurasi mu 2019, moto zikoresha amashanyarazi zatangiye imirimo yo gutwara abagenzi mu Rwanda, akaba ari naho iyi serivisi yari itangiriye bwa mbere ku Isi.

Ni umushinga mugari, aho biteganyijwe ko izi moto zikoresha amashanyarazi zizasimbura izikoresha lisansi bitarenze mu ntangiriro z’umwaka utaha wa 2025 nk’uko byemejwe na Minisiteri y’ibikorwaremezo mu rwego rwo kugabanya imyuka ihumanya ikirere no kwirinda ingaruka z'imihindagurikire y’ibihe.

Kugira ngo izi moto zigende zikoresha batiri ikoreshwa hagati y’ibilometero 65 na 70 ubundi ukajya guhinduza kuri sitasiyo zabugenewe ziri ahantu hanyuranye mu Mujyi wa Kigali ari zo; iya Rwandex, Nyabugogo na Kimironko.

Ibijyanye no kutangiza ikirere, hagaragajwe ko izi moto ari igisubizo. Ibi bijyana n’ubushakashatsi bwamuritswe n’Ikigo cy’Igihugu cyo Kubungabunga Ibidukikije (REMA) mu 2017 bwagaragaje ko ibiza ku isonga mu guhumanya umwuka uhumekwa mu Rwanda harimo umwotsi w’imodoka, moto, imyotsi y’amakara n’inkwi n’ibindi.

Iyo witegereje ingano y’iyi moto n’izisanzwe ubona ko yo ari nini ndetse iraremereye, motari ntibimusaba kuyihata imigeri ngo ihaguruke kuko yo ari ‘automatique’.

Uretse kubona ko urimo uva ahantu hamwe werekeza ahandi, ntushobora kumva ijwi rihinda rituruka muri moteri cyangwa mugasohora mwotsi.

Mu mwaka ushize wa 2023 u Rwanda rwari rwihaye intego yo kugera kuri moto zikoresha amashanyarazi 2500, mu gihe biteganyijwe ko uyu mwaka ugomba kurangira zimaze kurenga ibihumbi 10.

Mu 2020 Minisiteri y’Ubuzima mu Rwanda yagaragaje ko buri mwaka mu mavuriro hakirwa miliyoni eshatu z’abivuza indwara z’ubuhumekero barimo 13% bazitewe n’ihumana ry’ikirere.

Ikigo cy’igihugu gishinzwe kubungabunga ibidukikije, REMA kivuga ko u Rwanda rufite intego y’igihe kirekire yo kuba igihugu kitohereza imyuka ihumanya ikirere nk’uko bigaragara mu cyerekezo 2050.

U Rwanda kandi rufite intego y’uko kugeza mu mwaka wa 2030 ruzaba rwagabanyije ku gipimo cya 38% imyuka ihumanye yoherezwa mu kirere, ibinyabiziga bikoresha amashanyarazi ni kimwe mu bizafasha kugera kuri iyo ntego.