Umurundi ukina i Burayi yituye ikipe y'iwabo yamuzamuye ayiha umushahara yari kuzahemba umwaka wose

Uyu mukinnyi azajya yishyura Miliyoni 18 z'Amarundi buri kwezi kuko ni yo iyi kipe ikina muri shampiyona y'icyiciro cya mbere mu Burundi izajya ihemba kugeza uyu mwaka w'imikino wa 2024/25 urangiye.

Ndayishimiye Youssuf Nyange aganira n'ikinyamakuru cyo mu Burundi, Akeza Sports yavuze ko akunda gufasha ndetse avuga ko iyo iyi kipe itabaho umuryango we utari kuba ubayeho uko uri uyu munsi akaba ariyo mpamvu yahisemo kuyitura.

Yagize ati "Ku bwanjye, ni ibisanzwe, nkunda gufasha muri ducye mfite. Iyo hataba Ndikuriyo Révérien, sinibaza ko umuryango wanjye uba ubayeho nk'uko uriho uyu munsi. Aigle Noir CS ni ikipe y'umupira w'amaguru ariko kuri njye ni nk'umuryango nkunda cyane".

Yagiriye inama abakiri bato ababwira ko bakwiye kwitonda bagakora cyane dore ko ari cyo cyamugeje mu ikipe ya Nice ikina shampiyona y'icyikiro cya mbere mu Bufaransa.

Yagize ati "Inama nagira abakiri bato bakina umupira, ni uko bakwitonda, bagakora cyane kandi bakizera. Bakwiye kwigirira icyizere, bakitwara nk'abanyamwuga mu kibuga no hanze yacyo. Njyewe nageze aho ndi, kubera ko nkunda akazi kanjye. Nshaka kwereka Abarundi ko ushobora kurota ibikomeye ashobora no kubigeraho".

Kuva mu kwezi kwa Mbere mu mwaka utaha ikipe ya Aigle Noir Club, mu myitozo izajya yambara imyambaro yanditseho Ndayishimiye Youssuf Nyange mu rwego nabo rwo kumuha agaciro.

Ndayishimiye Youssuf Nyange w'imyaka 26 ukina mu kibuga afasha ba myugariro kugarira, yatangiye gukina ruhago nk'uwabigize umwuga ahereye muri Aigle Noir Club kuva muri 2016 kugeza muri 2020. Muri 2019 yatwaranye n'iyi kipe ibikombe 3 birimo icya shampiyona, icya Perezida w'iki gihugu ndetse n'icya Super Cup.

Yavuye muri iyi kipe yerekeza mu ikipe ya Yeni Malatyaspor Kulübü yo muri Turkia ayimaramo umwaka umwe. Mu 2021 yerekeje muri İstanbul Başakşehir Futbol Kulübü nayo yo muri iki gihugu, naho mu mwaka ushize yerekeza muri Nice yo mu Bufaransa ari nayo akomeje gukinamo kugeza uyu munsi.

Ndayishimiye Youssuf Nyange wituye ikipe y'iwabo mu Burundi yamufashije kuzamura impano ye y'umupira w'amaguru