Kuki hari abafatirwa mu makosa imyirondoro yabo igatangazwa?

ACP Boniface Rutikanga yavuze ko uretse Miss Nshuti Divine Muheto wafashwe yatwaye imodoka yasinze, hari n'abandi b'ibyamamare nk'abakinnyi, abahanzi n'abanyamakuru bakunze gufatirwa muri aya makosa.

Asobanura impamvu imyirondoro ya bamwe mu byamamare bifatirwa mu makosa arimo ubusinzi itangazwa abandi ntitangazwe, ACP Boniface yagize ati: "Ari abanyamuziki, ari abakina umupira w'amaguru, ari abari muri za 'comedy,' turabafata n'abanyamakuru barimo. Gusa mu by'ukuri buriya umunyamakuru [...] ntabwo twahita tubishyira ku karubanda. 

Gusa nidutangira kumva ko uvugwa ngo yaburiwe irengero, ntituzi aho ari, turavuga tuti 'rero reka tubivuge kuko turabona bigiye gufata iyindi ntera.' Ariko mu by'ukuri ari abanyamakuru, bose barimo turabafata. N'abanyamakuru bakorera ibitangazamakuru mpuzamahanga na bo turabafata kandi bakorera bimwe mu binyamakuru biri 'serious' ku buryo bamenye ko utwara ikinyabiziga wasinze akazi kabura."

Yasobanuye ko kubera ko hari abo bishobora kubuza akazi bitewe n'aho bakorera, bahitamo kugira ibanga imyirondoro yabo, ariko yongeraho ko bibaye ngombwa bayitangaza kuko nta tegeko baba bishe.

Mu kiganiro n'abanyamakuru bo mu Ntara y'Iburengerazuba cyibandaga ku gukomeza imikoranire mu kurwanya ibyaha n'ishusho y'uko umutekano wifashe, yasabye buri wese uruhare rwe mu guhangana n'ikibazo cy'ubusinzi cyiganje mu rubyiruko kuko atari ikibazo cyahagurukirwa na Polisi gusa.

Umuvugizi wa Polisi y'u Rwanda, ACP Rutikanga yasobanuye ko bahitamo gutangaza imyirondoro ya bamwe mu bafatirwa mu makosa kuko hari igihe sosiyete iba yibaza niba baraburiwe irengero