Alicia Keys na Cardi B inyuma ya Kamala Harris

Hashize amezi arenga atanu (5) ibyamamare byo muri Amerika kuva mu bahanzi, abanyapolitiki, abaherwe n'abakinnyi, berekana amahitamo yabo hagati y'abakandida babiri aribo Donald Trump w'Abarepubulikani na Kamaka Harris w'Abademokarate.

Byumwihariko muri iyi minsi ibikorwa byo kwiyamamaza biri kugana ku musozo, ni nako ibyamamare byahagurukiye kwerekana uwo bishyigikiye igihe kitararenga. Muri aha hiyongereyeho umuhanzikazi w'umunyabigwi Alicia Keys hamwe n'umuraperikazi Cardi B uri mu bakunzwe muri Amerika, bose bahurije ku kuba bashyigikiye Kamala Harris.

Cardi B witabiriye ibikorwa byo kwiyamamaza bya Kamala Harris byabereye muri Milwaukee muri Leta ya Wisconsin. Ubwo uyu muraperikazi yageraga ku rubyiniro yahavugiye amagambo menshi yerekana ko Harris abereye kuba Perezida byumwihariko yagize ati: ''Kamala niwe uzarengera uburenganzira bw'abagore muri iki gihugu, ntabwo Trump abyitayeho nta nubwo ashaka no kubyumva. Umuntu nk'uyu ntabwo akwiriye ko tumuha amahirwe ya Kabiri yo kuyobora ahubwo mureke duhe Kamala amahirwe bwa mbere niwe uzayakoresha neza''.

Umuraperikazi Cardi B yagaragaje ko Kamala Harris ariwe uzarengera uburenganzira bw'Abagore

Umuhanzikazi Alicia Keys wibitseho ibihembo byinshi bya 'Grammy Awards', yagiye kwamamaza Harris mu gace ka Norristown muri leta ya Pennslyvania, aho yerekanye ko igihe kigeze Amerika ikayoborwa n'umugore w'umwirabura ndetse anagaragaza ko bizagira ingaruka nziza ku bana.

Yagize ati: ''Ndabizi bamwe ntimwumva ko umugore yaba Perezida, ariko simbarenganya niko twese twakuze tubibona bitujya mu mutwe. Urebye ku rukuta rw'amateka y'iki gihugu uhabona abagabo gusa aribo babaye abaperezida. Ni abagabo gusa barimo umwe w'umwirabura, nta mugore n'umwe urimo.

Iki gihe ni icyo gutora umugore nawe akatuyobora, Kamala arabikwiye kandi afite gahunda nziza kuri twese ntawe asize inyuma. Ibi bizabera urugero abana bacu banone ko n'abagore bashoboye. Gutora Kamala ni ugutora ahazaza heza hatarimo ivangura ryaba irishingiye ku gitsina cyangwa ku ruhu''.

Umuhanzikazi Alicia Keys yavuze ko aricyo gihe umugore nka Kamala akayobora Amerika

Aba bagore bombi bakomeye mu muziki bashyigikiye Kamala Harris nyuma y'uko LeBron James na Arnold Schwarzenneger nabo baherutse kumushyigikira. Ni mu gihe kandi abarimo Beyonce, Kerry Washington, Barack Obama n'abandi benshi bamaze iminsi bamwamamaza. 

Tariki 5 Ugushingo nibwo amatora azaba hakarebwa niba ibi byamamare byaratanze umusaruro ku ruhande rwa Kamala Harris.

Kamala Harris yahoberanye urugwiro Cardi B warumaze kumwamamaza