Ikipe ya Rayon Sports yatangaje igihe izakorera inama y'inteko rusange izaberamo amatora ya komite nyobozi izasimbura komite icyuye igihe yarangije manda yayo tariki ya 24 z'uku kwezi.
Ibi iyi kipe yambara Ubururu n'Umweru yabitangaje mu ijoro ryo kuri uyu wa Gatatu tariki ya 30 Ukwakira 2024.
Mu itangazo yanyujije ku mbuga nkoranyambaga zayo yagize iti" Ubuyobozi bw'umuryango wa Rayon Sports buramenyesha abanyamuryango bayo bose ko buri gutegura inama y'inteko rusange izaterana kuwa Gatandatu tariki ya 16 Ugushyingo 2024.
Iyi nama iteganyijwemo amatora ya komite nyobozi izasimbura komite icyuye igihe yarangije manda tariki ya 24 Ukwakira 2024".
Rayon Sports yavuze ko kandi andi makuru izayamenyesha mu itangazo ritaha.
Ibi bibaye nyuma y'uko bivugwa ko abayoboye Rayon Sports bahuye na Minisitiri wa Siporo bakaganira ku gukemura ibibazo biri muri iyi kipe mu gihe kirambye.
Amakuru avuga ko Muvunyi yahawe guhagararira akanama kagomba kuvugurura amategeko agomba kugenga ahazaza h’umuryango wa Rayon Sports.Ako ka nama kagizwe na Twagirayezu Thadée, Gacinya Chance, Munyakazi Sadate, Me Zitoni Pierre Claver, Muhirwa Prosper n’abandi.
Komite izatorwa ni iyo gusimbura iyari irangajwe imbere na Uwayezu Jean Fideli wari waratorewe kuyobora manda y'imyaka ine gusa akaza kwegura mu kwezi gushize atayiringije.
Murera kuri ubu iyobowe na Ngoga Roger Aimable wari Visi Perezida kuri iyi Manda icyuye igihe.
Eng
RSS 
TANGA IGITECYEREZO