Ahabanza Imikino

Arsenal yaguye miswi na Liverpool, Manchester City ibyungukiramo

Yanditswe na: Aloys Niyonyungu
Taliki:27/10/2024 21:46 0

Ikipe ya Arsenal yanganyije na Liverpool ibitego 2-2 mu mukino wo ku munsi wa 9 wa shampiyona y'icyiciro cya mbere mu gihugu cy'u Bwongereza, Manchester City ibyungukiramo ifata umwanya wa mbere.

Ni mu mukino wakinwe kuri iki Cyumweru tariki ya 27 Ukwakira Saa Kumi n’Ebyiri n'iminota 30 kuri Emirates Stadium.

Umukino watangiye amakipe yombi yigana buri imwe ishaka aho yamenera ngo ihake igitego. Ku munota wa 9 gusa ikipe ya Arsenal yafunguye amazamu ku gitego cyari gitsinzwe na Bukayo Saka ku mupira yarahawe na Ben White aragenda acenga Robertson arekura ishoti riruhukira mu nshundura.

Nyuma yo gutsindwa ikipe ya Liverpool yatangiye urugendo rwo gushaka uko yakwishyura ndetse ikabona uburyo nkaho Mohamed Salah yabonye umupira ari imbere y'izamu ku makosa yarakozwe n'abakinnyi ba Arsenal ariko arekuye ishoti rinyura ruguru y'izamu.

Ku munota wa 18 ikipe ya Liverpool yaje kwishyura ku gitego cyari gitsinzwe na Virgil Van Dijk ku mupira yarahawe na Luis Diaz.

Umukino wakomeje Arsenal ariyo irema uburyo bwinshi imbere y'izamu gusa abakinnyi bayo barimo Gabriel Martinelli bakabupfusha ubusa.

Ku munota wa 43 ikipe y'abarashi yabonye igitego cya 2 gitsinzwe na Mikel Merino akoresheje umutwe kuri kufura yaritewe na Declan Rice.

Mu gice cya kabiri ikipe ya Liverpool yaje ishaka uko yakwishyura gusa ba myugariro ba Arsenal bagakomeza kwihagararaho. Ku munota wa 54 Gabriel Maghalhaes yagize ikibazo cy'imvune mu itako asimburwa na Jakub Kiwior.

Liverpool nayo yaje gukora impinduka mu kibuga havamo Luis Diaz, Robertson na Alexis Mac Allister hajyamo Cody Gakpo,Tsimikas na Dominic Szoboszlai.

Liverpool yakomeje gukina yiharira ibijyanye no guhererekanya umupira dore ko abakinnyi ba Arsenal bo bari bafashe n'umwanzueo wo gukina bugarira cyane kurusha gusatira.

Ku munota wa 81 Liverpool yabonye igitego cya kabiri gitsinzwe na Mohamed Salah ku mupira yarahawe na Darwin Nunez. Umukino warangiye amakipe yombi anganya ibitego 2-2 , Liverpool ihita itakaza umwanya wa mbere ijya kuwa Kabiri n'amanota 22 aho irushwa na Manchester City ya mbere inota rimwe mu gihe Arsenal yo yakomeje kuba ku mwanya wa gatatu n'amanota 18.